TOShKENT, 24-may — Sputnik. Rossiya prezidenti Vladimir Putin Rossiya musulmonlarini Ramazon hayiti bilan muborakbod etdi.
Putin ushbu ayyom o‘zida alohida ma’naviy ma’noni mujassam etishini ta’kidlagan. U bayram asrlar davomida nafaqat samimiy duolar, balki ko‘makka muhtojlarga e’tibor qaratish bilan ham nishonlanib kelayotganini urg‘ulagan.
“Ta’kidlaymanki, rossiyalik musulmonlar ota-bobolarining tarixiy, madaniy, diniy an’analariga chuqur ehtirom bilan qaraydi, ulg‘ayotgan avlodni ular bilan tanishtiradi. Rossiya musulmonlar jamoasi mamlakat hayotida faol qatnashmoqda, jamiyatda millatlararo tinchlik va fuqarolik totuvligini ta’minlash, oila institutini mustahkamlash, yoshlarni tarbiyalashga bebaho hissa qo‘shmoqda”, - deyiladi Rossiya yetakchisi tabrigida.
Ramazon hayitini dunyo musulmonlari qatori O‘zbekiston ahli ham katta shodiyona va xursandchilik bilan o‘tkazadi. O‘zbekiston prezidenti Shavkat Mirziyoyev ham mamlakat aholisini Ramazon hayiti bilan tabriklagan edi.
