TOSHKENT, 3 iyun — Sputnik. Turkmaniston prezidenti Gurbanguli Berdimuhamedov Ashxoboddagi Velosiped monumentini ochib berdi. Bu haqda Turkmaniston davlat axborot agentligi xabar qildi.
Taʼkidlanishicha, 2021 yilda Ashxobod Olimpiya shaharchasida velosiped sporti boʻyicha Jahon chempionati boʻlib oʻtadi. Ochilish marosimidan keyin prezident ishtirokchilar bilan birga 12 kilometrlik velopoygada qatnashgan.
Gurbanguli Berdimuhamedov oʻz nutqida ekologik va qiziqarli sport turi boʻlgan velosiped sporti davlat aholisining salomatligini mustahkamlashda muhim rol oʻynashini, shunga koʻra mamlakatda velosport bilan shugʻullanuvchi odamlar soni ortib borayotganini qayd etgan.
Eslatib oʻtamiz, 3 iyun – Butunjahon velosiped kuni. U butun dunyo boʻylab katta bayram sifatida nishonlab kelinadi.
