TOShKENT, 30-iyun - Sputnik. RF prezidenti Vladimir Putin rossiyaliklarga qilgan bugungi murojaatida Konstitutsiyaga kiritiladigan tuzatishlarni qadriyatlarning mustahkamlanishi, deya atadi. Bu haqda RIA Novosti xabar bermoqda.
"Rossiyaliklar konstitutsiyaga kiritilayotgan tuzatishlarni qo‘llab-quvvatlasalar, qadriyatlarni oliy kafolat sifatida mustahkamlab qo‘ygan bo‘ladilar", - degan Putin.
Putinga ko‘ra, rossiyaliklar aniq huquqiy normalar ko‘rinishidagi tuzatishlar uchungina ovoz berayotgani yo‘q.
"Biz o‘zimiz yashashni xohlaydigan mamlakat uchun ovoz bermoqdamiz. Zamonaviy ta’lim va sog‘liqni saqlash tizimiga ega bo‘lgan. Fuqarolarni ijtimoiy jihatdan ishonchli himoya qiladigan. Jamiyatga hisobdor bo‘lgan samarali hukumatga ega. Biz farzandlarimiz va nabiralarimizga qoldirishni xohlaydigan va u uchun mehnat qiladigan davlatga ovoz bermoqdamiz", - dedi Rossiya yetakchisi o‘z murojaatida.
Bunday muhim qaror qabul qilar ekan, har bir inson avvalo o‘z yaqinlari haqida o‘ylaydi, bizlarni birlashtiradigan qadriyatlarga tayanadi, dedi Putin.
"Bu haqiqat va adolat. Bu - inson mehnatiga, katta yoshdagi kishilarga bo‘lgan hurmat. Bu - oila va farzandlar haqidagi g‘amxo‘rlik. Ularning sog‘lig‘i, ma’naviy kamoloti haqidagi g‘amxo‘rlik. Asosiy qonunga kiritiladigan tuzatishlar - sizlar tomonidan qo‘llab-quvvatlangan taqdirda – ushbu qadriyatlar va tamoyillarni, eng oliy, mutlaq konstitutsiyaviy kafolatlar sifatida mustahkamlaydi", - dedi Putin.
