TOShKENT, 7-iyul - Sputnik. Namanganda sanitariya-epidemiologiya osoyishtalik markazidagi talon-tarojliklar fosh etildi, deb xabar berdi Bosh prokuratura matbuot-xizmati.
Holat Bosh prokuratura huzuridagi Departamentning Namangan viloyat boshqarmasi tomonidan o‘tkazilgan tergovga qadar tekshiruvi davomida aniqlangan.
Namangan viloyati Sanitariya-epidemiologiya osoyishtalik markazi mansabdor shaxslari "F.B.", "A.T." va "H.S." MChJlar bilan tuzilgan shartnomaga muvofiq, 275,9 mln so‘m bo‘lgan "gipoxlorid kalsiy" dezinfeksiyalovchi vositalarni 524,8 mln so‘mga, ya’ni o‘rtacha bozor narxidan 248,9 mln so‘mga qimmat narxlarda sotib olib, juda ko‘p miqdordagi budjet mablag‘larini talon-toroj qilganliklari aniqlangan.
Mazkur holat yuzasidan markazning mansabdor shaxslariga nisbatan Jinoyat kodeksining 167-moddasi 3-qismi bilan jinoyat ishi qo‘zg‘atilib, tergov harakatlari o‘tkazilmoqda.