TOShKENT, 23 okt - Sputnik. "UzAuto Motors" AJ tomonidan bir necha kun oldin tarqatilgan, Monopoliyaga qarshi kurashish qo‘mitasi tomonidan OAVlarga bosim o‘tkazilgani haqidagi xabar - tasdiqlanmadi, deb xabar qilmoqda Axborot va ommaviy kommunikatsiyalar agentligi.
"Agentlik tomonidan 15 ta yetakchi elektron ommaviy axborot vositalari rahbarlari o‘rtasida so‘rov o‘tkazilib, mazkur sud ishini yoritishda Monopoliyaga qarshi kurashish qo‘mitasi tomonidan hech qanday bosim o‘tkazilmagani qayd etildi", - deyilgan xabarda.
Ushbu masala yuzasidan AOKA tomonidan «UzAuto Motors» AJga asossiz ma’lumotni tarqatmaslik va bu kabi holatlarga yo‘l qo‘ymaslik bo‘yicha tegishli ogohlantirish kiritiladi.
Agentlik yana bir bor asossiz, yolg‘on ma’lumotlarni tarqatish uchun javobgarlik borligini eslatib o‘tadi, yuridik va jismoniy shaxslar hamda OAVga tarqatilayotan ma’lumotlarning asosliligini tekshirishni tavsiya qiladi.
Eslatib o‘tamiz, bir necha kun oldin UzAuto Motors va Monopoliyaga qarshi kurash qo‘mitasi orasidagi sud tartibida bo‘lib o‘tayotgan surishtiriv ishlarini OAVda yoritish borasida bayonot tarqatilgan edi. Unda avtomobil kompaniyasi qo‘mitani OAVga bosim o‘tkazishda ayblagan edi.
