Jamiyat

Umra-2022: oʻzbekistonliklar uchun ziyorat qachon boshlanadi va uning narxi qancha

© AP Photo / Amr NabilPalomniki sovershayut obxod vokrug Kaabы
Palomniki sovershayut obxod vokrug Kaabы  - Sputnik Oʻzbekiston, 1920, 16.01.2022
Obuna boʻlish
Yandex newsTelegram
Oʻzbekiston musulmonlari idorasi Umra safariga oid savollarga javob berdi.
TOSHKENT, 16 yanv — Sputnik. Oʻzbekiston musulmonlari idorasi Umra ziyorati qachondan boshlanishi va uning narxlari haqida maʼlumot berdi.
Taʼkidlanishicha, 5 yanvar Saudiya Arabistonidagi "Abu Sarhad" hamkor shirkati bilan Umra – 2022 mavsumini amalga oshirish boʻyicha shartnoma tuzilgan.
Musulmonlar idorasining maʼlum qilishicha, shundan soʻng hududlarda pandemiyadan oldin navbatda turgan fuqarolar roʻyxatlarini shakllantirish, aviaqatnov jadvallarini ishlab chiqish, qoʻshimcha toʻlovlarni amalga oshirish va ziyoratchilarni tibbiy koʻrikdan oʻtkazish ishlari boshlab yuborilgan.
Umra safariga oid bir qator savollarga toʻliq javoblar.

Umra safari qachondan boshlanadi?

—2022 yil 22 yanvar kuni birinchi reysni Saudiya Arabistoniga uchirishga tayyorgarlik koʻrilmoqda. Shundan soʻng 25, 28 yanvar kunlari ham navbatdagi reyslar amalga oshiriladi. Kelgusida reyslar sezilarli darajada oshirib boriladi.

Boshlanayotgan umra safariga qachon roʻyxatga yozilgan fuqarolar joʻnatiladi?

— Joriy umra mavsumida birinchi navbatda pandemiyadan oldin, yaʼni 2020 yil fevral oyi oxiriga qadar umra ziyorati uchun toʻlovlarni amalga oshirib, safarga bora olmagan fuqarolar yuboriladi.

Umra toʻlovi qancha etib belgilandi?

Pandemiyadan oldin, yaʼni 2020 yil fevral oyiga qadar umra ziyorati uchun oxirgi belgilangan toʻlovlarni amalga oshirganlar qoʻshimcha ravishda 4 770 000 soʻm mablagʻ toʻlaydi. Ushbu qoʻshimcha toʻlovni belgilashda, mehmonxonalarda ziyoratchilarning xonalarga, avtobuslarda oʻrindiqlarga joylashtirishda oraliq masofa hisobiga 50 foizgacha qisqartirilish, oziq-ovqat mahsulotlarini qadoqlangan holda tarqatish, oʻrnatilgan boshqa karantin tartib-qoidalarni taʼminlash, 15 foiz Saudiya QQS soligʻi kabi sarf-xarajatlar ham hisobga olingan. Shuningdek, Makka va Madina shaharlarida eng zamonaviy mehmonxonalar ziyoratchilarga xizmat qiladi.
Mazkur toʻlovlarni amalga oshirishda ziyoratchilarga qulaylik yaratish maqsadida, "Aloqabank" ATning barcha filiallarida har kuni, hatto shanba va yakshanba kunlari ham qabul qilinadi.

Ziyoratchilar uchun qaysi vaktsina bilan emlanish talab etiladi?

— Umra safariga boruvchi fuqaro COVID-19 ga qarshi “Astra-Zeneca”, “Moderna”, “Pfizer” yoki “Jonson & Jonson” vaktsinalari bilan toʻliq emlanib, sertifikatga ega boʻlishi lozim. Talab qilingan vaktsinalarni emas, balki "Sputnik V" va Oʻzbekiston-Xitoy kabi vaktsinalar bilan toʻliq emlangan fuqarolar yuqorida sanalgan vaktsinalaridan biri bilan 1 marta emlanishi kifoya qiladi.

Saudiya Arabistonida Umra amalini ado etish qilish uchun dastur orqali navbatga turish tartibi qanday?

– Har bir ziyoratchida smartfon (Samsung, iPhone yoki boshqa turdagi sensor) telefoni boʻlishi talab etiladi. Android telefon uchun “PlayMarket” va IOS mobil qurilma uchun "AppStore"dan "توكلنا" ("Tawakkalna") va "اعتمرنا" – ("Eatmarna") elektron dasturlari yuklatilgan boʻlishi lozim. Mazkur dasturlar telefonda "geolokatsiya" va "internet" yoqilgandagina ishlaydi. Bu dasturlar ziyoratchi Saudiya Arabistoni davlat chegarasidan oʻtib, Madina shahrida tegishli maʼlumotlar bilan toʻldirilgandan keyingina ishga tushadi.
Ziyoratchi Saudiyaga yetib borishi bilan Saudiya mobil aloqa operatori sim kartasini xarid qiladi va internet toʻplamini ishga tushiradi. Sim kartani aeroportda yoki Madina shahridagi mehmonxonada xarid qilish mumkin boʻladi.

Saudiya Arabistonida qanday karantin talablari oʻrnatilgan?

– Saudiya Arabistoni hududiga umra ziyorati uchun kirayotgan xorijlik fuqaro talab etilgan vaktsinalar bilan emlangan boʻlib, bu toʻgʻridagi sertifikatga va 48 soatlik PZR testiga ega boʻlishi, ziyoratchi oʻzi bilan 30 ta tibbiy niqob olishi (har 4 soatda almashtirish uchun) va Saudiya Arabistonida doimiy tibbiy niqobda yurishi va oraliq masofaga rioya qilinishi belgilangan. Taʼkidlash kerakki, tibbiy niqob taqmaganlik uchun 300 dollar jarima belgilagan. Ziyoratchilar Umra safari yakunida Vatanga qaytishdan avval oʻz hisoblaridan Makka shahridagi mehmonxonada PZR test topshirishlari kerak boʻladi.

Umra safari uchun yangi navbatlar qayerda yoziladi?

— 18 yoshdan katta boʻlgan Oʻzbekiston fuqarosi umra safariga borish uchun oʻzi roʻyxatda turgan mahalla fuqarolar yigʻiniga shaxsini tasdiqlovchi hujjat bilan chiqib, Umra safari uchun ochilgan maxsus daftarga roʻyxatga yoziladi va shu haqdagi maʼlumotnomani oladi. Ushbu daftar boʻyicha navbati kelgan fuqaroni MFY tuman-shaharga tavsiya beradi. Soʻng hududdagi poliklinikada tibbiy koʻrikdan oʻtadi. Natijalar yaxshi chiqsa, Umra uchun belgilangan toʻlov summasini toʻlaydi. Shuningdek, xorijga chiqish pasporti, tibbiy koʻrikdan oʻtgani, vaktsina olgani toʻgʻrisidagi maʼlumot va sertifikat va toʻlov qogʻozining nusxasini taqdim qiladi.
Yaqin kunlarda Umra safariga borish imkoniyati tiklanadi
Yangiliklar lentasi
0