Jamiyat

Karantin sabab kechikkan pensiyalar toʻliq qoplab beriladi

© Sputnik / Ramiz BaxtiyarovNatsionalnaya valyuta Uzbekistana — sum
Natsionalnaya valyuta Uzbekistana — sum - Sputnik Oʻzbekiston, 1920, 04.04.2022
Obuna boʻlish
Yandex newsTelegram
Oʻzbekistonda 2020 yil 24 martdan koronavirus pandemiyasi sababli karantin eʼlon qilingan va bugungi kunga qadar bekor qilinmagan.
TOSHKENT, 4 aprel — Sputnik. Oʻzbekistonda karantin eʼlon qilingan kundan eʼtiboran (2020 yil 24 mart) muayyan sabablarga koʻra yoshga doir pensiya tayinlanishi uchun oʻz vaqtida murojaat qilolmagan fuqarolarga oʻtgan davrlar uchun pul mablagʻi toʻliq toʻlab beriladi. Bu haqida Pensiya jamgʻarmasi xabar bermoqda.

“Oʻzbekiston Respublikasida 2020 yil 24 martdan koronavirus pandemiyasi sababli karantin eʼlon qilingan va bugungi kunga qadar bekor qilinmagan. Bunda, fuqaro pensiya olish huquqi 2020 yil 24 martdan keyin paydo boʻlib, pensiya tayinlash uchun 2022 yil mart oyida murojaat qilgan boʻlsa ham unga pensiya huquqi paydo boʻlgan sanadan boshlab toʻliq toʻlab beriladi”, - deyiladi xabarda.

Oʻzbekiston Respublikasining 2022 yil 9 fevraldagi 752-sonli Qonuniga muvofiq, fuqarolarning pensiyaga chiqish vaqti karantin davriga (amal qilgan vaqtda) toʻgʻri kelib, karantin sababli pensiya tayinlash uchun murojaat qila olmagan boʻlsalar, ular karantin tugaganidan keyin bir oy oʻtib murojaat qilgan taqdirda ham pensiya tayinlanadi va bir yoʻla toʻlab beriladi.
Taʼkidlanishicha, deylik fuqaro 2020 yil 1 may kuni 60 yoshga toʻldi. Biroq, turli sabablar tufayli pensiya tayinlash uchun Pensiya jamgʻarmasiga oʻz vaqtida murojaat qila olmadi. U 2022 yil yanvar oyida (yaʼni 20 oydan keyin) pensiya tayinlash uchun murojaat qildi. Bunda ushbu fuqaroga 2020 yil 1 maydan pensiya tayinlanib, unga 2020 may – 2022 yil yanvar oylari (20 oy) uchun pensiyasi bir yoʻla hamda kelgusida har oylik pensiyasi toʻlanadi.
Maʼlumot uchun, bugungi kunda Pensiya jamgʻarmasi tomonidan har oyda 4 mln. nafardan ortiq pensiya va nafaqa oluvchilar hamda 1,5 mln. nafardan ortiq kam taʼminlangan oilalarga yoki 6,4 mln. nafar fuqaroga bolalar nafaqasi va moddiy yordam taʼminoti amalga oshirilmoqda. Yaʼni, Jamgʻarma tomonidan respublika aholisining 29 foiziga har oyda xizmat koʻrsatib kelinmoqda.
Yangiliklar lentasi
0