Jamiyat

Imkoniyati cheklangan tadbirkorlarga qanday yordam koʻrsatilmoqda - video

Obuna boʻlish
Yandex newsTelegram
Xorijiy turistlar imkoniyati cheklangan hunarmandlar tayyorlagan buyumlarni koʻp xarid qilishadi. Biroq, hunarmandlarga bozorga chiqishga va mahsulotlarini tanitishga kim yordam beradi? Hunarmandlar qanday muammolarga duch kelishadi? Javoblar – Sputnik materialida.
Dam olish kunlari Toshkentning Navroʻz etnoparkida maxsus koʻrgazma-yarmarkalari oʻtkaziladi. Bunda imkoniyati cheklangan tadbirkor-hunarmandlar ham ishtirok etishadi. Bu haqida Sputnik muxbiriga Ijtimoiy turizm assosiatsiyasi maʼlum qildi.
Bir necha hafta oldin Assosiatsiya qoshida Imkoniyati cheklangan tadbirkorlarni qoʻllab-quvvatlash markazi ochildi. Loyiha turizm va madaniy meros vazirligi tomonidan qoʻllab-quvvatlandi. Gap shundaki, xorijiy turistlar orasida oʻzbek hunarmandlarining qoʻl mehnatlari mashhur.
Albatta, imkoniyati cheklangan hunarmandlarga bozorda mahsulotlarining savdosi bilan shugʻullanish qiyinchiliklar tugʻdiradi. Tadbirkorlarni qoʻllab-quvvatlash markazi bunday muammolarni hal etishni oʻz oldiga maqsad qilgan.
Ijtimoiy turizm assosiatsiyasi rahbari Mohira Sultonovaning soʻzlariga koʻra, garchi markaz Navroʻz bayrami arafasida tashkil etilgan boʻlsada, allaqachon 20 ta uyda ishlaydigan hunarmandlar bilan hamkorlik qilishni boshlagan. Tadbirkorlar asosan ayollar boʻlib- ularning asosan eshitish va tayanch harakat tizimlarida muammolari bor.
“Tadbirkorlarimiz asosan Toshkent shahri va Toshkent viloyatidan”, - deydi Mohira Sultonova.
Hunarmandlarga mahsus savdo maydonlari qanday imkoniyatlar yaratmoqda? Sputnik Oʻzbekiston muxbiri bu borada ularning fikrlari bilan qiziqdi.
Salima Irmatova - Angren shahridan. U bolaligidan nogironlik aravasida harakatlanadi. Yigirma yildan buyon palantina, qoʻlqoplar va angora junidan paypoqlar toʻqiydi.
“Bularni toʻqishimda butun oilam koʻmak beradi. Chunki junni sotib olib, tozalagandan soʻng, boʻyash ham kerak. Palantinalarni maxsus mashinkada toʻqiyman, qoʻlqoplar va paypoqlar esa- qoʻl mehnatim”,- deydi u.
Salima opa har kuni bittadan palantin yopinchigʻi toʻqiydi. Hunarmand opa toʻqigan buyumlarning mashhur boʻlishini va bunday tadbirlarda tez-tez ishtirok etib turishni istaydi.
Yana bir hunarmand ayol- toshkentlik Nargiza Qodirova. Nargiza opaning tayanch-harakat tizimida tugʻma kasalligi bor. U melxior va yarimqimmatbaho toshlardan milliy taqinchoqlar yasaydi. Oʻzi istiqomat qiladigan mahallada taqinchoqlarnini mustaqil sotadi.
“Taqinchoqlarimni mahallamdan tashqari, boshqa shaharlarda, imkoni boʻlsa dunyo mamlakatlari miqyosida sotishni istayman. Bu uchun bizga maxsus transport yaratib berishsa yaxshi boʻlardi”, - deydi opa.
Toshkentda nogironligi boʻlgan tadbirkorlarni qoʻllab-quvvatlash markazi ochildi
Mohira Sultonovaning soʻzlariga koʻra, imkoniyati cheklangan insonlar imkoni boricha oilasiga yordam berishni istashadi. Ular uchun oʻz mehnati bilan pul topish, oilada, jamiyatda oʻzini kerakli inson deb his qilish muhim. Shu sababli markazda hunar oʻrganmoqchi boʻlgan imkoniyati cheklangan insonlar uchun bepul mahorat darslari oʻtkaziladi.
“Agar hunarmandlarimizning markazga kelishga imkoniyati boʻlmasa, oʻzimiz borib oʻrgatamiz”, - deydi Assosiatsiya rahbari.
Mohira Sultonovaning aytishicha, juda koʻpchilik hunarmandlar odamlar orasiga chiqishga va oʻz mahsulotlari haqida soʻzlab berishga iymanishadi. Shuning uchun ular koʻproq odamlar bilan suhbatlashishlari kerak.
Koʻrgazma-yarmarkalar bunda ularga yordam beradi: hunarmand qahramonlarimizdan namuna olib yana boshqa mana shunday qoʻli gul ayol-tadbirkorlar koʻrgazmalarda ishtirok etishlariga turtki boʻlishi mumkin.
Yangiliklar lentasi
0