Jamiyat

Farmatsevtika tarmogʻi qanday rivojlantiriladi

© Sputnik / Denis Abramov / Fotobankka oʻtishKapsulы i tabletki
Kapsulы i tabletki - Sputnik Oʻzbekiston, 1920, 13.04.2022
Obuna boʻlish
Yandex newsTelegram
Dori vositalariga talabni oʻrganib, ularni mahalliylashtiriladi. Mahalliy ishlab chiqaruvchilar qoʻllab-quvvatlanadi va qator imtiyozlar beriladi. Tumanlar dorivor oʻsimliklarni yetishtirishga moslashtiriladi.
TOSHKENT, 13 apr — Sputnik. Prezident Shavkat Mirziyoyev 12 aprel kuni farmatsevtika tarmogʻini rivojlantirish masalalari boʻyicha yigʻilish oʻtkazdi. Unda tarmogʻidagi koʻrsatkichlar tahlil qilinib, qoʻshimcha vazifalar belgilandi.
Davlat rahbari matbuot xizmati xabariga koʻra, Oʻzbekistonning yangi taraqqiyot strategiyasida mamlakatda dori vositalari ishlab chiqarishni 3 baravarga oshirish vazifasi qoʻyilgan. Bu borada yanvarda besh yillik dastur ham qabul qilindi.
Lekin sohada ishlarning bugungi holati bilan bu marralarga erishib boʻlmaydi, dedi davlat rahbari.
Mamlakatda yiliga 1 milliard 600 million dollarlik farmatsevtika mahsulotlari isteʼmol qilinadi. Shundan katta qismi – qariyb 1 milliard 200 million dollarlik mahsulotlar import qilinmoqda.
Qashqadaryo, Surxondaryo, Xorazm, Buxoro va Fargʻonada isteʼmol qilinadigan dorining atigi 2-5 foizi mahalliy ishlab chiqaruvchilar hissasiga toʻgʻri keladi.
“Hududlarni dori vositalari bilan taʼminlanganini tahlil qildim – bu mutlaqo qoniqarsiz. Shuning uchun oʻzimizda ishlab chiqarilgan dori vositalarini koʻpaytirish boʻyicha keskin choralar koʻrishimiz shart”, - dedi prezident.
Farmatsevtika tarmogʻini rivojlantirish agentligida loyihalar bilan ishlash tizimini yangidan qilish vazifasi qoʻyildi. Dori vositalariga talabni oʻrganib, ularni mahalliylashtirish chora-tadbirlari belgilandi.

Investitsiyalarni jalb qilish

Farmatsevtika agentligida loyihalar bilan ishlash tizimini mutlaqo yangidan tashkil etish zarurligi qayd etildi.
Agentlik va viloyat hokimlari oldiga joriy yilning oʻzida 80 million dollarlik 34 ta loyihani ishga tushirish vazifasi qoʻyilgan. Misol uchun, joriy yilda Toshkent farmatsevtika parkida 50 million dollarlik 2 ta loyihani ishga tushirish rejalashtirilgan.
Jami ushbu klasterda 3 yilda 280 mln dollarlik 6 ta korxonani ishga tushirish koʻzda tutilgan.
Mutasaddilarga yirik xorijiy kompaniyalar bilan muzokaralar oʻtkazib, kamida 10 ta brendni jalb qilish boʻyicha kelishuvga erishish topshirildi.
Yigʻilishda Investitsiyalar loyiha markazi tomonidan ishlab chiqilgan 18 ta yirik istiqbolli loyiha boʻyicha investitsiyalarni jalb qilish vazifasi qoʻyildi.
Jumladan:
Andijonda onkologiya va gepatitga qarshi dorilar boʻyicha Hindiston bilan;
Toshkent shahri va Toshkent viloyatida yurak-qon tomir va nafas yoʻllari, yuqumli kasalliklar boʻyicha Germaniya va Turkiya bilan;
Namangan, Samarqand va Sirdaryoda tibbiy buyumlar boʻyicha Xitoy va Koreya bilan hamkorlikni yoʻlga qoʻyish zarurligi koʻrsatib oʻtildi.

Mahalliy farmatsevtika korxonalarini qoʻllab-quvvatlash

Shu bilan birga, joylarda mahalliy ishlab chiqaruvchilarning infratuzilma bilan bogʻliq muammolari koʻrib chiqildi. Mutasaddilarga viloyat hokimlari bilan birga bir oy muddatda kichik sanoat zonalarida infratuzilmani yaxshilashga ajratilgan mablagʻlar hisobidan 50 milliard soʻm yoʻnaltirish topshirildi.
Investitsiyalar va tashqi savdo vazirligi yangi loyihalarni moliyalashtirishga hamda aylanma mablagʻlarni toʻldirish uchun kreditlarga 1 mayga qadar 100 mln. dollar, 1 sentyabrga qadar yana 100 mln. dollar jalb qilish choralarini koʻradi.
Yigʻilishda mahalliy farmatsevtika korxonalarini qoʻllab-quvvatlash boʻyicha choralar belgilandi:
qoʻshilgan qiymat soligʻidan ozod etiladigan xom ashyolar roʻyxati Investitsiyalar vazirligi, Bojxona qoʻmitasi va Farmatsevtika agentligi tomonidan tasdiqlanadi. Hozirgi kunda ushbu roʻyxat 5 ta vazirlik tomonidan tasdiqlanadi va 5 yildan buyon yangilanmagan;
mahalliy korxonalarning GMP sertifikatini olish bilan bogʻliq xarajatlari Farmatsevtika agentligi tomonidan qoplab beriladi;
korxonalarni modernizatsiya qilishni moliyalashtirish Toʻgʻridan-toʻgʻridan investitsiyalar jamgʻarmasi ishtirokida amalga oshiriladi.

Eksportbop dorivor oʻsimliklarni yetishtirish

Eksportbop dorivor oʻsimliklarni yetishtirishni kengaytirish maqsadida bu sohaga kooperatsiya va oilaviy tadbirkorlik uchun nazarda tutilgan barcha imtiyoz va moliyalashtirish tartiblari tatbiq etiladi.
Moliya vazirligiga aholi tomorqasi uchun quduq qazishga qoʻshimcha 50 milliard soʻm ajratish topshirildi. Joriy yilda zaʼfaron plantatsiyalarini kamida 5 baravarga koʻpaytirish choralari koʻriladi.
Endilikda dorivor oʻsimliklarni qayta ishlaydigan korxonalar:
2025 yil 1 yanvarga qadar uskuna va ehtiyot qismlar, xomashyo importida bojxona bojidan ozod qilinadi;
tayyor mahsulotlar eksporti uchun transport xarajatlarining 50 foizigacha qismi qoplab beriladi;
har 10 gektar plantatsiyalarga suv chiqarish uchun 600 ming soʻmdan subsidiya ajratiladi;
dorivor oʻsimliklar plantatsiyalariga boshqa turdagi qishloq xoʻjaligi ekinlarini joylashtirishga yoʻl qoʻyilmaydi.
Yangi loyihalarni boshlashga va aylanma mablagʻlarni toʻldirish uchun Qishloq xoʻjaligi jamgʻarmasidan 100 mlrd. soʻm ajratiladi.
Yigʻilishda yil yakuniga qadar 80 ta tumanni dorivor oʻsimliklarni yetishtirishga moslashtirib, 7,5 ming gektarda plantatsiyalar tashkil etish (hozirda 600 gektar) vazifasi qoʻyildi.
Yangiliklar lentasi
0