Jamiyat

Egizbuloqdagi seldan soʻng suv va tuproqlarda bakteriyalar aniqlanmadi

© Foto: Jizzax viloyati hokimligiForishda sel oqibatlarini bartaraf etish ishlari
Forishda sel oqibatlarini bartaraf etish ishlari - Sputnik Oʻzbekiston, 1920, 28.04.2022
Obuna boʻlish
Yandex newsTelegram
Seldan zarar koʻrgan huddudagi xonadonlar dezinfektsiya qilindi. Uy hayvonlari esa quturish va kuydirgiga qarshi emlangan.
TOSHKENT, 28 apr — Sputnik. Egizbuloqda olingan tahlil namunalarida yuqumli kasallik qoʻzgʻatuvchi virus va bakteriyalar aniqlanmadi. Bu haqda Jizzax viloyati hokimligi xabar bermoqda.
20 aprel kuni kuchli yogʻingarchilik oqibatida Forish tumani Egizbuloq qishlogʻining Bogʻiston va Choʻlpon koʻchalarida joylashgan aholi turar-joylari sel oqimlaridan zarar koʻrdi.
Xabarda aytilishicha, sel suvlarining bir qismi qishloqning yuqori qismida joylashgan “Boyqoʻchqor ota” qabristonidagi 100 dan ortiq qabrlarga ham ziyon yetkazdi.
Egizbuloq qishlogʻida tashkil etilgan favqulodda vaziyatlarni bartaraf etish shtabi hududda oʻta xavfli yuqumli kasalliklar tarqalishi hamda zaharlanish bilan bogʻliq favqulodda vaziyatlarni oldini olish boʻyicha bir qator ishlarni amalga oshirdi.
Forish tumani obodonlashtirish boshqarmasi xodimlari qabristonda zarar koʻrgan 62 ta qabrdagi jasadlarni sanitariya qoidalariga muvofiq qayta koʻmishdi. Qabriston hududi obodonlashtirilib, seldan zarar koʻrgan ariq va soylar tozalandi. Ayni paytda qabristonning yordamchi binosi qayta tiklanmoqda.
Veterinariya va chorvachilikni rivojlantirish boshqarmasi xodimlari esa zararlangan hududlarda toʻplangan 46 ta uy hayvonlarining jasadini sanitariya qoidalariga muvofiq koʻmishdi. It va mushuklar quturishga qarshi, yirik hamda mayda shoxli uy havonlari kuydirgiga qarshi vaksina bilan emlandi.
Ekologiya va atrof muhitni muhofaza qilish boshqarmasi va “Toza hudud” DUK tomonidan 1184 tonnadan ortiq chiqindi tozalandi. Ular oʻrnatilgan tartibda zararsizlantirildi. Sanitariya-epidemiologik osoyishtalik va jamoat salomatligi boshqarmasi maxsus texnika yordamida qabriston, uning atrofi hamda hayvon jasadlari koʻmilgan joylarni toʻliq dezinfektsiya qildi.
Jizzax va Samarqanddagi sel talofatlari haqida maʼlumot berildi
Seldan zararlangan aholi yashash xonadonlarida dezinfeksiyalash ishlari olib borildi. Ularga gumanitar yordamlarar qabul qilish, saqlash va tarqatish jarayonida sanitariya talablariga rioya etilishi nazoratga olindi.
Hozirda “Jizzax suv taʼminoti” MCHJ tomonidan 4 ta maxsus texnika yordamida aholiga muntazam ravishda toza ichimlik suvi yetkazib berilmoqda.
Sogʻliqni saqlash boshqarmasi tomonidan 3 ta tez tibbiy yordam brigadasi tashkil etilgan. Qishloq aholisini 158 nafar tibbiyot xodimi tibbiy koʻrikdan oʻtkazmoqda.
Shu bilan birga, hududdagi toza suv, qabristondagi ariq suvlari hamda tuproq namunalari laboratoriya tekshiruvidan oʻtkazildi. Olingan xulosalarga koʻra, barcha tahlil natijalari meʼyorida ekanligi maʼlum boʻldi. Yuqumli kasallik qoʻzgʻatuvchi virus va bakteriyalar aniqlanmadi.
Eslatib oʻtamiz, avvalroq “Egizbuloq” mahallasida kuchli sel oqibatlarini bartaraf etish va zarar koʻrgan mahalla uchun gumanitar yordam koʻrsatish ishlari boshlangan edi.
Yangiliklar lentasi
0