O‘zbekiston yog‘ eksportini vaqtincha taqiqladi
10:39 01.06.2022 (yangilandi: 10:46 01.06.2022)
© Sputnik / Georgiy Zimarev
/ Obuna bo‘lish
O‘simlik yog‘i, shu jumladan paxta va kungaboqar yog‘ini eksport qilish vaqtincha taqiqlandi.
TOShKENT, 1-iyun - Sputnik. 2022 yil 1-iyundan boshlab o‘simlik yog‘i, shu jumladan paxta va kungaboqar yog‘ini eksport qilish vaqtincha taqiqlanadi. Bu haqda O‘zbekiston prezidenti Shavkat Mirziyoyevning tegishli farmonida belgilangan.
Farmonga muvofiq, quyidagilarni 2022-yil 1-iyundan boshlab O‘zbekiston bojxona hududidan tashqariga olib chiqish (eksport qilish) vaqtinchalik taqiqlanadi:
o‘simlik yog‘i, shu jumladan paxta, kungaboqar yog‘i, bundan amaldagi kontraktlar (shartnomalar) doirasida 2022-yil 1-iyunga qadar oldindan to‘lovlar amalga oshirilgan holatlar, shuningdek, O‘zbekiston “bojxona hududida qayta ishlash” bojxona rejimida qayta ishlanganlari mustasno;
kungaboqar urug‘lari (TIF TH kodi 1206 00) hamda boshqa yog‘ o‘simliklarining urug‘lari va mevalari (TIF TH kodi 1207), bundan qonunchilikda belgilangan holatlar mustasno.
Vazirlar Mahkamasiga mazkur tovarlarning ichki bozorda yetarli hajmi mavjud bo‘lgan taqdirda, ushbu bandda ko‘rsatilgan tovarlar eksportini qayta tiklash huquqi berildi.
2023 yil 1-yanvarga qadar quyidagilar:
Vazirlar Mahkamasining 2021-yil 29-yanvardagi “Mahalliy ishlab chiqaruvchilarni qo‘llab-quvvatlash chora-tadbirlari to‘g‘risida”gi 41-son qarorida nazarda tutilgan davlat buyurtmachilari tomonidan davlat xaridlari doirasida import qilinadigan oziq-ovqat mahsulotlarini sotib olish bo‘yicha cheklovlar;
O‘zbekistonga olib kiriladigan oziq-ovqat mahsulotlarini davlat tilida majburiy markirovka qilish tartibi vaqtinchalik to‘xtatiladi.
Shuingdek, 2022-yil 1-maydan boshlab 2023-yil 1-yanvarga qadar bir qator tovarlarni olib kirishda bojxona bojlarining nol stavkalari belgilanadi. Savdo-iqtisodiy munosabatlarda eng ko‘p qulaylik berish rejimi nazarda tutilmagan mamlakatlarda ishlab chiqarilgan tovarlarga nisbatan bojxona bojining ikki baravar stavkasi qo‘llanilmaydi.
