Dunyoda

BRICS - 2022: Yakuniy deklaratsiya qabul qilindi

© Fotoxost-agentstvo brics-russia2020.ru / Fotobankka oʻtishFlagi stran BRIKS
Flagi stran BRIKS - Sputnik Oʻzbekiston, 1920, 24.06.2022
Obuna boʻlish
Yandex newsTelegram
BRICS davlatlari dunyoda adolatli raqobat uchun sharoit yaratish, BMTning yetakchi rolini saqlab qolish va yadro qurolidan xoli boʻlgan dunyoga intilish tarafdori.
TOSHKENT, 24 iyun — Sputnik. BRICS davlatlari (Braziliya, Rossiya, Hindiston, Xitoy, Janubiy Afrika) rahbarlari Xitoyda boʻlib oʻtgan ittifoqning oʻn toʻrtinchi sammiti yakunida Pekin deklaratsiyasini qabul qildi. Hujjat Kreml saytida eʼlon qilindi, deya xabar berdi “RIA Novosti”.

Deklaratsiyada xalqaro savdo-iqtisodiy hamkorlikda adolatli raqobat uchun shart-sharoit yaratish, rivojlanayotgan mamlakatlarning jahondagi iqtisodiy va siyosiy jarayonlarida ishtirok etishiga koʻmaklashish, iqtisodiyot va boshqa sohalarda 2030 yilgacha barqaror rivojlanish dasturini amalga oshirishni qoʻllab-quvvatlash rejalari qayd etilgan.

Deklaratsiyaga koʻra, BRICS mamlakatlari xalqaro tizimda BMTning markaziy rolini saqlab qolish tarafdori. Shu bilan birga, BRICS BMT Xavfsizlik kengashini isloh qilish borasidagi munozaraga yangi hayot bagʻishlashga tayyor. Xitoy va Rossiya Braziliya, Hindiston va JARning "BMTda yanada sezilarli rol oʻynashga urinishi"ni qoʻllab-quvvatlaydi.
Sammitda ishtirokchi davlatlar terrorizm, pul yuvish va soxta narsalarga qarshi kurashish salohiyatini kuchaytirishga chaqirdi, yadro qurolidan holi dunyoga intilishlarini eʼlon qildi va G20 ning global iqtisodiy boshqaruvdagi yetakchi rolini saqlab qolishga intilishini bildirdi.
Shuningdek, davlat rahbarlari BMT Xavfsizlik kengashini isloh qilish, Ukraina, Afgʻonistondagi vaziyat va Eron yadroviy muammosini muhokama qilish boʻyicha munozaralarni faollashtirishga tayyor ekanliklarini maʼlum qildi.
Sammit davomida Rossiya prezidenti Vladimir Putin chaqiriq va tahdidlarning transmilliy xususiyatiga birgalikda javob berish zarurligini aytdi.
“Biz mojarolarni hal qilish, terrorizm, uyushgan jinoyatchilik, jumladan, yangi texnologiyalardan jinoiy maqsadda foydalanish, iqlim oʻzgarishi, xavfli infektsiyalar tarqalishiga qarshi faqat birgalikdagina kurashish mumkinligini bir necha bor taʼkidlaganmiz”, dedi Vladimir Putin.
Prezident, shuningdek, faqat halol va oʻzaro manfaatli hamkorlik “ayrim davlatlarning notoʻgʻri oʻylangan, gʻarazli harakatlari tufayli” yuzaga kelgan jahon iqtisodiyotidagi inqirozdan chiqish yoʻlini topishga yordam berishini qoʻshimcha qildi.
Unga koʻra, BRICS’ga aʼzo besh davlat xalqaro xavfsizlik va barqaror rivojlanishni taʼminlashda samarali hamkorlik qilish uchun ulkan siyosiy, iqtisodiy, ilmiy-texnikaviy hamda insoniy salohiyatga ega.
Biroq hozirda BRICS davlatlarining xalqaro huquqqa asoslangan koʻp qutbli dunyoni shakllantirishdagi yetakchiligi har qachongidan ham koʻproq talab qilinmoqda.
Oʻz navbatida Xitoy rahbari Si Tszinpin ittifoqqa “yangi qon” olib kirish jarayonini tazlashtirishga chaqirdi.
“Soʻnggi yillarda koʻplab davlatlar BRICS’ga qoʻshilish istagini bildirdi. Assotsiatsiyamizga yangi qon kiritib, biz BRICS’ga yangi hayotiylik olib kelamiz. Bu yil biz turli formatlarda kengayish masalasini qayta-qayta muhokama qildik, hamfikrlarimiz BRICS oilasiga tezroq qoʻshilishi uchun bu jarayonni tezlashtirishimiz kerak”, - deya qoʻshimcha qildi u.
Shuningdek, Xitoy rahbari ayrim davlatlarning harbiy ittifoqlarni kengaytirishga urinishlarini beqarorlik deb atadi. Bundan tashqari, Si Tszinpin bir tomonlama sanktsiyalarga qarshi kurashishga chaqirdi.
Maʼlumot uchun, Xitoy raisligidagi boʻlib oʻtadigan 14-BRICS sammiti payshanba kuni videokonferentsiya orqali ish boshladi. Sammitda assotsiatsiya mamlakatlari rahbarlari — Rossiya prezidenti Vladimir Putin, Hindiston bosh vaziri Narendra Modi, Braziliya prezidenti Jair Bolsonaro, Janubiy Afrika prezidenti Siril Ramafosa ishtirok etmoqda. Sammitga XXR raisi Si Tszinpin raislik qilyapti.
May oyi oʻrtalarida Xitoy tashqi ishlar vaziri Van I Xitoy tomoni BRICS’ni kengaytirish jarayonini boshlashni taklif qilayotganini aytdi. Uning soʻzlariga koʻra, bu tashkilotning ochiqligi va inklyuzivligini namoyish etishga, rivojlanayotgan mamlakatlarning umidlariga javob berishga, assotsiatsiyaning vakillik va taʼsirini oshirishga yordam beradi, tinchlik va taraqqiyotni saqlashga yanada katta hissa qoʻshadi. Hozirda BRICS tarkibiga Braziliya, Rossiya, Hindiston, Xitoy va Janubiy Afrika kiradi.
Yangiliklar lentasi
0