Jamiyat

"Sodir boʻlgan voqealar bizni yanada hushyor va sezgir boʻlishga chaqiradi" — Mirziyoyev

© Nova24Shavkat Mirziyoyev v Karakalpakstane
Shavkat Mirziyoyev v Karakalpakstane - Sputnik Oʻzbekiston, 1920, 03.07.2022
Obuna boʻlish
Yandex newsTelegram
Prezident ommaviy tartibsizlik aybdorlari muqarrar jazoga tortilishini aytdi.
TOSHKENT, 3 iyul — Sputnik. Prezident Shavkat Mirziyoyev 3 iyul kuni Qoraqalpogʻiston Joʻqorgʻi Kengesida deputatlar, faxriy va faollar bilan uchrashuvda fuqarolardan jipslashishni, yakdil boʻlishni soʻradi.
"Dengizning qurigan qismida 1 million 733 ming gektar maydonda yashil hududlar barpo etildi. Orolboʻyi hududining oʻsimlik va hayvonot dunyosini tiklash boʻyicha besh yillik milliy dastur ishlab chiqilmoqda. Orolboʻyi mintaqasini rivojlantirish masalasi birinchi marta davlat siyosatining ustuvor yoʻnalishiga aylandi. Yuksak xalqaro minbarlardan doimo Orol muammosiga jahon jamoatchiligi eʼtiborini qaratib kelmoqdamiz.
Toʻliq ishonch bilan aytamanki, Qoraqalpogʻistonda amalga oshirilayotgan ijobiy oʻzgarishlar bundan buyon ham albatta izchil surʼatlarda davom ettiriladi.
Chunki Qoraqalpogʻistonning taqdiri – bu Oʻzbekistonning taqdiri, qoraqalpoq xalqining baxti va farovonligi – bu butun oʻzbek xalqining baxti va farovonligidir.
Men hayot sinovlarida toblangan qoraqalpoq xalqining donishmandligiga ishonaman va ularni aql-idrok bilan ish tutishga, turli xil, jumladan, chetdan boʻlayotgan gʻarazli chorlov va harakatlarga aldanmaslik, ularning qurboniga aylanmaslikka chaqiraman.
Ayirmachilikka, ommaviy tartibsizliklarga, hokimiyat organlariga zoʻravonlik yoʻli bilan qarshilik koʻrsatishga daʼvat etadigan har qanday harakatlarga amaldagi qonunchilikka muvofiq keskin chora koʻriladi, aybdorlar esa muqarrar jazoga tortiladi.
Aminmanki, Qoraqalpogʻistonning mehnatkash, donishmand, olijanob va bagʻrikeng eli mana shunday murakkab davrda oʻzbek va qoraqalpoq xalqlari taqdirining birligi va yaxlitligiga, ogʻizbirchiligiga asoslangan muqaddas qadriyatlarini bundan buyon ham koʻz qorachigʻidek asrab-avaylab yashaydi.
Sodir boʻlgan voqealar bizni yanada hushyor va sezgir boʻlishga chaqiradi. Bugun jonajon Oʻzbekistonimizda tinchlik va osoyishtalikni saqlash uchun, farzandlarimiz va nabiralarimizning yorugʻ kelajagini taʼminlash uchun metin iroda, jipslik va yakdillik har qachongidan ham zarurdir", degan davlat rahbari.
"Fursatdan foydalanib, men Oʻzbekistonni oʻz ona Vatani deb biladigan barcha vatandoshlarimizga, muhtaram otaxon va onaxonlarimizga, qadrli aka-uka va opa-singillarimizga, aziz farzandlarimizga murojaat qilib aytmoqchiman.
Hech kimga sir emas, hozirgi vaqtda dunyoning turli mintaqalarida oʻzaro shafqatsiz raqobat, millatlararo va dinlararo ziddiyatlar, separatizm, millatchilik, radikalizm kabi tahdidlar tobora kuchayib bormoqda.
Ana shunday tahlikali vaziyatda mamlakatimizda yashayotgan turli millat va dinga mansub insonlar oʻrtasida doʻstlik va hamjihatlikni mustahkamlash, goʻzal diyorimizda barqaror va bardavom taraqqiyotni taʼminlash, xalqimizning bunyodkorlik salohiyatini, uning ertangi kunga boʻlgan ishonchini oshirish barchamizning, avvalo, rahbar va mutasaddilarning nafaqat vazifasi, balki muqaddas insoniy burchidir.
Biz faqat mana shu yoʻl bilan bugungi kunning barcha tahdid va xavf-xatarlariga munosib javob berishimiz, turli buzgʻunchi gʻoyalarga qarshi jamiyatimizda, avvalo, yoshlarimiz qalbida mustahkam immunitet yaratishimiz, xalqimizning xohish-irodasi bilan tanlangan demokratik islohotlar yoʻlidan ortga qaytmasdan yanada samarali natijalarga erishishimiz mumkin.

Barchamiz uchun Vatan bitta. Bizni yagona, ulugʻ bir maqsad birlashtiradi. U ham boʻlsa, yurtimiz tinchligi, Vatanimiz taraqqiyoti va xalqimiz farovonligidir.
Biz Yangi Oʻzbekiston va Yangi Qoraqalpogʻistonni barchamiz birgalikda albatta barpo etamiz.
Oʻz hayoti davomida tarixning koʻp-koʻp mashaqqatli sinovlarini mardona yengib oʻtgan azmu shijoatli, olijanob xalqimiz oʻz oldiga qoʻygan mana shunday buyuk maqsadlarga albatta erishadi, deb ishonaman", dedi davlat rahbari soʻzining yakunida.
Yangiliklar lentasi
0