Jamiyat

Pochta-kuryer xizmati endi rivojlanadimi?

© Depositphotos / PuhhhaDevushka poluchayet posыlku
Devushka poluchayet posыlku - Sputnik Oʻzbekiston, 1920, 05.07.2022
Obuna boʻlish
Yandex newsTelegram
Axborot texnologiyalari va kommunikatsiyalarini rivojlantirish vazirligi axborot xizmati rahbari Sherzod Ahmadov Sputnik muxbiri bilan suhbatda pochta aloqasi bilan bogʻliq maʼlumotlarga oydinlik kiritdi.
TOSHKENT, 4 iyul – Sputnik. Axborot texnologiyalari va kommunikatsiyalarini rivojlantirish vazirligi axborot xizmati rahbari Sherzod Ahmadov Sputnik muxbiri bilan suhbatda pochta aloqasi bilan bogʻliq maʼlumotlarga oydinlik kiritdi.
“2020 yilda COVID-19 pandemiyasi oqibatlari, birinchi navbatda izolyatsiyaga boʻlgan talablarni va oʻzaro jismoniy taʼsirlarni cheklashga, raqamli xizmatlarga boʻlgan talablarni esa keskin ortishiga olib keldi. Natijada, “Oʻzbekiston pochtasi” AJ elektron tijorat sohasida faol ishtirok etish hamda joʻnatmalarni tez fursat ichida yetkazib berish uchun bir qator ishlarni amalga oshirdi”, - deydi Ahmadov.
Jumladan, pochta almashinuvlari haftasiga 5 marotabadan 6 marotabaga oʻtkazildi.
“2021 yil yakunlariga koʻra eng koʻp foydalanilgan joʻnatma xalqaro mayda paketlarga toʻgʻri kelmoqda”, deydi mutaxassis.
2021 yilda “Oʻzbekiston pochtasi” AJning jami kiruvchi joʻnatmalardagi ulushi 6 %ni tashkil etgan.
Bugungi kunda, butun dunyoda, shu jumladan Oʻzbekistonda ham internet-doʻkonlari orqali mahsulotlarni xarid qilishga boʻlgan talab ortib bormoqda.
“Xorijiy, shu jumladan AliExpress internet-doʻkonidan xarid qilgan mahsulotlarning Oʻzbekiston Respublikasi hududiga kirib kelishi va xaridorlarga yetkazib berish jarayonlari jadal ketmoqda”, - deydi mutaxassis.
AliExpress internet-doʻkonidan mahsulot xarid qilayotganingizda uni yetkazib berish boʻyicha bir qator tariflar taklif etiladi, albatta xaridor oʻziga maqbul boʻlgan tarifni tanlaydi, yetkazib berish esa bepul.
Hozirgi kunda, joʻnatmalar Turkiya, Estoniya, Litva, Singapur, Frantsiya, Belgiya, Shvetsariya, Shvetsiya, Daniya va Gollandiya davlatlaridan havo transporti orqali, Latviya, Xitoy, Estoniya, Gruziya davlatlaridan esa yer usti transporti orqali yuborilmoqda.
“AliExpress internet-doʻkonidan xarid qilingan mahsulot xaridorning mulki sanaladi va u daxlsizdir. Ammo Oʻzbekiston Respublikasiga kirib kelayotgan va undan chiqib ketayotgan barcha xalqaro joʻnatmalar ustidan bojxona nazorati amalga oshirishini ham unutmaslik kerak”, - deydi Ahmadov.
Shuningdek, Xitoy bilan Qozogʻiston chegarasida tashkil etilgan “Xargos” logistika markazi pandemiya sababli toʻliq ishlamayotganligi yer usti transporti bilan kelayotgan joʻnatmalarning kechikib kelishiga sabab boʻlmoqda.
Xorijiy internet-doʻkonlaridan xarid qilingan mahsulotlarni qisqa muddat ichida Oʻzbekiston Respublikasi hududiga kirib kelishi eng muhim vazifalardan biri ekanligini inobatga olib, “Oʻzbekiston pochtasi” AJ tomonidan qoʻshni davlatlar bilan hamda hamkor tashkilotlar bilan muzokoralar oʻtkazib, joʻnatmalarni respublika hududiga olib kelishda muqobil yoʻllarni oʻrganib chiqmoqda.
Bundan tashqari, “Oʻzbekiston pochtasi” AJ tomonidan joʻnatmalarni qabul qilish, saralash, onlayn rejimda kuzatib borish va yetkazib berish jarayonlariga axborot texnologiyalari joriy etilmoqda hamda logistika tizimlari optimallashtirilmoqda.
Bugungi kunda pochta aloqasi obʼyektlarini zamonaviy koʻrinishda kapital taʼmirlash va qayta qurish hamda yagona korporativ dizayn asosida jihozlash boʻyicha ishlar olib borilmoqda. Pochta aloqasi obʼyektlarida anʼanaviy pochta aloqasi xizmatlari bilan bir qatorda bank va davlat xizmatlari koʻrsatish ham yoʻlga qoʻyilgan.
Eslatib oʻtamiz, pochta aloqasi tizimini yanada rivojlantirish maqsadida 9 iyun kuni yangi tahrirdagi “Pochta aloqasi toʻgʻrisida”gi Qonuni prezident tomonidan imzolandi.
Yangiliklar lentasi
0