Jamiyat

Mirziyoyev Nukus shahrida yuz bergan voqealar yuzasidan Bosh prokurorga topshiriq berdi

© Press-slujba prezidenta UzbekistanaPrezident Shavkat Mirziyoyev
Prezident Shavkat Mirziyoyev - Sputnik Oʻzbekiston, 1920, 06.07.2022
Obuna boʻlish
Yandex newsTelegram
Bosh prokurorga har bir holatni chuqur va xolisona oʻrganish va voqea ishtirokchilarining xatti-harakatlariga adolatli huquqiy baho berish topshirigʻi berildi.
TOSHKENT, 6 iyul – Sputnik. Nukus shahrida yuz bergan voqealarda kuch tuzilmalarining harakatlari ham chuqur tahlil qilinadi. Prezident Nukusdagi harakatlarga adolatli huquqiy baho berish yuzasidan Bosh prokurorga topshiriq berdi.
Shavkat Mirziyoyev arxitektura, qurilish va shaharsozlik masalalariga bagʻishlangan yigʻilish avvalida Qoraqalpogʻistonda yuz bergan namoyishlarga ham toʻxtalib oʻtdi.
“Nukus shahrida yuz bergan voqealar natijasida, afsuski, bir qancha fuqarolar halok boʻldi va jabr koʻrdi. Shu munosabat bilan oʻz yaqinlarini yoʻqotgan oilalarga chin yurakdan hamdardlik bildiraman. Shifoxonalarda davolanayotgan bemorlarga esa tezroq sogʻayib ketishlarini tilayman”, deydi prezident.
Taʼkidlanishicha, bu harakatlarga chetdagi gʻarazli kuchlar tomonidan yillab tayyorgarlik koʻrilgan. Ularning asl maqsadi Oʻzbekistonning hududiy yaxlitligiga tajovuz qilish va millatlararo nizo keltirib chiqarishga qaratilgan.
Boʻlib oʻtgan voqealarni har tomonlama chuqur va xolisona tergov qilish uchun Bosh prokurorning birinchi oʻrinbosari boshchiligida tergov va surishtiruv guruhi ish olib bormoqda.
Shuningdek, bu jarayonga xolis tomonlarni, yaʼni, jamoatchilik vakillari, deputatlar va faollarni ham jalb qilish zarurli qayd etildi.
Shuning uchun, Bosh prokuror N.Yoʻldoshevga har bir holatni chuqur va xolisona oʻrganish va voqea ishtirokchilarining xatti-harakatlariga adolatli huquqiy baho berish topshirigʻi berildi.
Kuch tuzilmalarining harakatlari ham chuqur tahlil qilinishi, agar ular tomonidan notoʻgʻri kuch ishlatilgan boʻlsa, amaldagi qonunchilikka asosan ularning ham jinoiy javobgarligi taʼminlanishi ham aytib oʻtildi.
Shavkat Mirziyoyev oʻz soʻzida hozirgi vaqtda Qoraqalpogʻistondagi vaziyat izga tushayotgani, eng asosiysi, aholining tinchligi va hayotiga hech narsa xavf solayotgani yoʻqligi haqida ham gapirib oʻtdi.
Maʼlum qilinishicha, iqtisodiyot tarmoqlari ishlamoqda, odamlar kundalik ishlari va yumushlari bilan band. Dehqonlar oʻz dalasida ishlamoqda, peshona teri bilan yaratgan hosillarini yigʻishtirmoqda.
Bozorlar, doʻkonlar va boshqa xizmat koʻrsatish obʼyektlari faoliyat yuritmoqda. Mamlakatning barcha hududlaridan bu yerga oziq-ovqat va boshqa zarur mahsulotlar yetkazib berilmoqda.
Davlat hokimiyati organlari, jamoatchilik vakillari va huquqni muhofaza qilish tuzilmalari tomonidan hududda barqaror vaziyatni taʼminlash boʻyicha uyushgan va muvofiqlashgan holda ish olib borilmoqda.
Yangiliklar lentasi
0