TOShKENT, 15-iyun — Sputnik. O‘zbekiston Musulmonlar idorasi Anvar qori Tursunovning hayot yo‘li haqida maqola e’lon qildi.
O‘z ishini muharrirlikdan boshlagan
Anvar qori Tursunov 1981-yil Toshkent davlat universitetining filologiya fakultetini tamomlab, mehnat faoliyatini "Yoshlik" jurnalida muharrir vazifasidan boshlagan. Keyin O‘zFA, Abdulla Qahhor uy muzeyi, O‘zbekiston Yozuvchilar uyushmasi kabi nufuzli tashkilotlarda faoliyat yuritgan. 1989-1992 yillarda Qur’oni karimning Shayx Alouddin Mansur tarjima qilgan matniga muharrirlik qildi. Ana shu jarayon Anvar qorining ilmiy-ijodiy faoliyatida diniy mavzular yanada ustuvor bo‘lishiga turtki bo‘lgan.
Diniy faoliyati
Anvar qori Tursunov bevosita diniy sohadagi faoliyatini 1994-yil Toshkentning hozirgi Yashnobod tumanidagi "Yangiobod" masjidi imom-xatibi sifatida boshlagan. "O‘sha yilning o‘zidayoq yurtdoshlarimiz ajoyib bir voizni kashf etdilar", — deyiladi maqolada.
1999 yildan Toshkent shahar bosh imom-xatibi va "Xoja Ahror Valiy" masjidi imom-xatibi bo‘lib ishlash barobarida 2001-yil Toshkent islom institutini ham tugatdi. 2015-yildan boshlab esa "Minor" masjidi bosh imom-xatibi vazifasida faoliyat yuritganlar.
Anvar qori o‘zbek tilini puxta bilgan salohiyatli muharrir bo‘lgani bois O‘zbekiston musulmonlari idorasi fatvolarini tayyorlashda faol qatnashar, diniy nashrlar va mahalliy matbuotga o‘qishli maqolalar yozar, xalqaro anjumanlarda ma’ruzalar bilan ishtirok etar, diniy va ilmiy mavzulardagi asarlarga muharrirlik qilar, radio va televideniyening ma’naviy va ma’rifiy dasturlarida boshlovchilik va chiqishlar qilar edi.
Shuncha ish bilan birga tarjima, ta’lif va tasnifga ham vaqt topar edi. Ayniqsa, olimning "Sharq yulduzi", "Jahon adabiyoti" jurnallari, "O‘zbek adabiyoti va san’ati" gazetasida Alisher Navoiy ijodi va faoliyati, navoiyshunoslik va tasavvuf ilmi haqidagi ko‘plab ilmiy, ma’rifiy-ma’naviy maqolalari o‘quvchilar e’tiboriga tushgan edi.
Bir so‘z bilan aytganda, Anvar qori Tursunov ommaviy axborot vositalari orqali doimiy chiqishlari, diniy mavzudagi ma’ruzalari bilan xalqimiz qalbidan munosib joy olgan ulamo edi.
Talabalardan yordamlarini ayamasdilar
Anvar qori aka "Minor" masjidiga kelganidan so‘ng o‘sha muxlislar oqimi shu yerga kelishni odat qilishdi. Bu odamning ovozida tinglovchiga taskin bo‘ladigan nimadir bor edi. Keyin u kishi tolibi ilmlarga xayrixoh bo‘lgan nihoyatda fazilatli inson edi.
2005 yilgi juma ma’ruzalaridan birida shunday degan edi:
Bu Anvar qori akaning o‘zi so‘zlab bergan voqea. Endi bevosita o‘zimiz guvoh bo‘lgan hodisaga e’tibor qiling. Bu yil qishda yog‘ingarchilik kam bo‘lib kunlar isib ketgani esingizda. Shunday kunlarning birida juma namozini "Minor" masjidida o‘qidik. Namoz so‘nggida Anvar qori aka sovuq havo va qor yog‘dirishini so‘rab duo qildi. Masjidga kirguncha issiq havodan bir oz lohaslanib turgan edik. Chiqqanimizda ikkita janoza bor ekan. Janozani o‘qigunimizcha havo shu qadar sovidiki, hatto sovqotib qoldik. Biror soat o‘tganidan so‘ng qor aralash yomg‘ir qo‘yib berdi.
Anvar qori aka dilkash suhbatdosh bo‘lib, ko‘ngilga yoqadigan muloyim mutoyiba ham qilar edi. U kishining suhbatiga to‘ymas edi odam. Keyin Anvar qori aka bunday dedilar deb to‘lqinlanib gapirib yurar edi.
O‘lim oramizdan shunday buyuk insonni olib ketdi. Chunki Alloh taoloning amri shunday bo‘lgan. Ulug‘larimiz aytganidek, bunday zotlar aniq vazifa bilan keladi. O‘sha vazifani o‘rniga qo‘yganidan so‘ng bu dunyo hayotidan haqiqiy dunyo ko‘chadi.
Bizningcha, Anvar qori Tursunovning vazifasi ko‘ngillarga Islom nurini yoqish, Islom ma’rifatini tarqatish bo‘lgan va u bu vazifani bir ulamoning imkoniyati darajasida muvaffaqiyatli ravishda bajardi. 60 yosh umr ko‘rgan odamga bundan ortiq sharaf bo‘lishi mumkinmi!..