13:17 15 Sentyabr 2019
Efir
  • RUB142.96
  • EUR10360.56
  • USD9395.63
Prezident RF Vladimir Putin i prezident Uzbekistana Shavkat Mirziyeyev (sprava) na tseremonii ofitsialnoy vstrechi v Tashkente.

Putin tashrifi maqsadi: Oʻzbekiston va Rossiya I mintaqalararo hamkorlik forumi yakunlari

Press-slujba Prezidenta RF
Analitika
Havola olish
Dilshoda Rahmatova
Vladimir Putinning Oʻzbekistonga davlat tashrifi (31)
329830

Oʻzbekistonga shu paytgacha xorij davlatlaridan bu qadar koʻpsonli "desant" kelib tushmagan. Birinchi Oʻzbekiston-Rossiya mintaqalararo forumi davomida, umumiy hajmi 25 milliard dollarga teng 800ta kelishuvlar imzolandi. Forum yakunlarini eʼtiboringizga havola qilamiz

TOSHKENT, 19 okt - Sputnik. Rossiya va Oʻzbekiston oʻrtasida savdo-iqtisodiy sohada umumiy hajmi 6,2 milliard dollarlik kelishuvlar va investitsiya sohasida 20,8 milliard dollarlik 202 ta bitim imzolandi.

Ikki davlat tashkilotlari tomonidan imzolangan hujjatlarning umumiy hajmi 25 milliard dollarni tashkil qildi.

Shuni alohida aytish joizki, Oʻzbekiston-Rossiya birinchi mintaqalararo hamkorlik forumi ikki kun - 18-19 oktyabr kunlari davom etdi va Oʻzbekistonga xorij davlatlari orasida birinchi marta aynan Rossiyadan bu qadar koʻp "desant" kelib tushdi.

Samarali maydon

Oʻzbekiston Iqtisodiyot vaziri Botir Xodjayev Rossiya prezidenti Vladimir Putin va Oʻzbekiston rahbari Shavkat Mirziyoyevning birinchi mintaqalararo hamkorlik forumidagi ishtirokini ikki davlat viloyatlari oʻrtasidagi hamkorlik aloqalariga nisbatan katta eʼtibor sifatida baholadi.

Xodjayev maʼlumotiga koʻra, iqtisodiyotning turli jabhalari vakillari, davlat tuzilmalari, parlament, ikki davlat regionlari hokimiyati organlari vakillari ishtirok etgan ushbu forum maydonchalarida 11ta biznes uchrashuvlar oʻtkazilgan. Tadbirda Rossiyaning 17ta regionidan 173 nafar administratsiya vakillari va 400dan ortiq Rossiya kompaniyalari qatnashgan.

"Bunday salmoqli delegatsiya tashrifi tufayli umumiy hajmi 25 milliard AQSH dollari boʻlgan 792tadan ziyod ikkiyoqlama bitimlar va memorandumlar imzolandi", - dedi Xodjayev.

Vazir bayonotiga koʻra, Rossiya va Oʻzbekiston oʻrtasida 20ta ulgurji-taqsimot markazlarini tashkil etish boʻyicha kelishuv imzolangan. 

"Misol uchun, Orenburgdagi loyiha noyob joylashuvga ega, deb taʼkidlash mumkin. Chunki - Gʻarb-Sharq, Janub-Shimol va Yevropa-Gʻarbiy Xitoy singari xalqaro transport koridorlari shu yerdan oʻtadi. Rossiyalik hamkorlar bilan birgalikda erishilgan kelishuvlarni keng koʻlamda hayotga tatbiq etish boʻyicha oʻz sayi-harakatlarimizni kuchaytiramiz va shu maqsadda, har bir loyiha, xususan, 79ta qoʻshma korxona, 23ta savdo uylari va 20ta ulgurji-taqsimot markazlarini tashkil etish boʻyicha aniq "yoʻl xaritalari" ishlab chiqiladi", - deb maʼlum qildi Xodjayev.

Oreshkin: Oʻzbekiston iqtisodiyoti sobiq SSSR mamlakatlari orasida eng yuqori koʻrsatkichga ega boʻladi

Rossiya iqtisodiy rivojlantirish vaziri Maksim Oreshkin forum yakunida soʻzlagan nutqida, ushbu tadbir noyob voqea boʻlganini, garchi ilk bor tashkil etilgan boʻlsa-da, rekord natija qayd etganini maʼlum qildi.

"Rossiya tomondan forumda 1200 kishi qatnashdi, bu esa Rossiya va Qozogʻiston oʻrtasida oʻtkazilgan forum koʻrsatkichlaridan ikki barobar koʻp", - dedi u.

Oreshkin ushbu forum - Oʻzbekiston prezidenti tashabbusi natijasi ekanini, Shavkat Mirziyoyev 2017-yilning aprel oyida Rossiyaga amalga oshirgan tashrifi davomida bu boradagi ishlarni boshlab berganini aytdi.

"Rossiyaning 300dan ortiq kompaniyalaridan 800dan ziyod vakillar kelishdi. Ular oʻzbekistonlik hamkorlar bilan biznesni rivojlantirishga tayyor. Tadbirga bildirilgan katta qiziqishga hayratlanmasa ham boʻladi, negaki, Oʻzbekiston - aholi soni tezlikda oshayotgan, iqtisodiyoti taraqqiy etayotgan davlat. Chuqur oʻylab amalga oshirilayogan iqtisodiy islohotlar tufayli yaqin yillarda Oʻzbekiston iqtisodiyoti sobiq sovet ittifoqi hududida eng yuqori koʻrsatkichlarni namoyon etadi", - deb taʼkidladi rossiyalik amaldor.

Oreshkin, shuningdek, forum davomida ikki davlat vakillari oʻrtasida hamkorlikdagi koʻplab loyihalar muhokama qilinganini aytib oʻtdi. Bular: qishloq xoʻjaligi, tekstil sohasi, logistika, energetika, raqamli iqtisodiyot va bir turkum boshqa yoʻnalishlar.

Biznes-zavtrak v ramkax pervogo mejregionalnogo rossiysko-uzbekskogo foruma v Tashkente
© Sputnik / Dilshoda Raxmatova.
Biznes-zavtrak v ramkax pervogo mejregionalnogo rossiysko-uzbekskogo foruma v Tashkente

Oreshkin, shuningdek, soʻnggi 1 yil ichida Rossiya va Oʻzbekiston oʻrtasidagi iqtisodiy, madaniy va mintaqalararo hamkorlik aloqalari dadil rivojlanganini taʼkidladi.

"Bizning vazifamiz esa, belgilab olingan rejalarni hayotga tatbiq etish va hamkorlikning yangi yoʻnalishlarini shakllantirishdan iborat. Hamkorlikdagi faoliyatimiz iqtisodiyotimizni jadallik bilan rivojlantirishga, aholimizga esa oʻz daromadlarini hayot sifatiga tatbiq etishga xizmat qiladi", - deb ishonch bildirdi Oreshkin.

Mirziyoyev: Rossiya bizning strategik hamkorimiz va ittifoqdoshimiz

Oʻzbekiston prezidenti Shavkat Mirziyoyev oʻz chiqishi davomida forumning tashkiliy jihati va yuqori darajada oʻtkazilgani - ikki davlat oʻrtasidagi oʻzaro qiziqish va hamkorlikning ulkan salohiyatidan dalolat berishini qayd etdi. 

"Strategik sherigimiz va ittifoqdoshimiz - Rossiya Federatsiyasi bilan barqaror va ishonchga asoslangan munosabatlarimizni yuqori baholaymiz va samimiy qadrlaymiz. Shu bugun toʻliq oʻzaro tushunish va ishonch, ochiqlik ruhida oʻtgan muzokaralar - bizning koʻpqirrali hamkorliklarimizni xalqlarimiz manfaati yoʻlida kengaytirish va mustahkamlash boʻyicha qatʼiy niyatimizni namoyon etdi. Bu borada biz mintaqalararo hamkorlikka muhim ahamiyat qaratmoqdamiz", - dedi Oʻzbekiston yetakchisi. 

Mirziyoyev ikki davlat oʻrtasidagi mintaqalararo hamkorlik ayniqsa, soʻnggi bir yil ichida faol tus olganini, Oʻzbekistonning 14ta regioni rahbarlari Rossiyaning 26ta subʼyektida tashrif uyushtirishganini qayd etdi. Bugungi tadbirda Rossiyaning 18ta subʼyektlari vakillari ishtirok etishayotgani va bunaqasi shu paytgacha boʻlmaganini alohida taʼkidladi.

Oʻzbekiston prezidenti forum ishtirokchilariga murojaat qilar ekan, biznes doiralarga ikki davlat hamkorligida yuqori texnologiyali ishlab-chiqarishlar sonini koʻpaytirish zarurligini tavsiya etdi. 

"Talabgir mahsulotlarni ishlab-chiqarishda hamda uchinchi davlatlar bozorlarini oʻzlashtirishda kooperatsiya koʻlamini kengaytirish lozim", - dedi prezident Mirziyoyev.

Forumdagi samarali hamkorlikka misol keltirar ekan, Oʻzbekiston yetakchisi Rossiyaning Ivanovo viloyatidagi kompaniyalar ishtirokida Navoiy vilotida tekstil klasteri tashkil etilishi, Tataristondagi sheriklar bilan hamkorlikda Toshkent viloyatida kimyoviy oʻgʻitlar ishlab-chiqaruvchi, Qoraqalpogʻistonda esa farmatsevtika preparatlarini ishlab-chiqaruvchi korxonalar yoʻlga qoʻyilishini aytdi va ushbu forumda bu kabi koʻplab loyihalar borasida kelishuvlar boʻlganini qoʻshimcha qildi.

Prezidentы prinyali uchastiye v pervom Forume mejregionalnogo sotrudnichestva Uzbekistan – Rossiya
© Press-slujba prezidenta Uzbekistana.
Prezidentы prinyali uchastiye v pervom Forume mejregionalnogo sotrudnichestva "Uzbekistan – Rossiya"

"Ammo eng asosiy natija - regionlarimiz oʻrtasida mustahkam va uzoq istiqbolga moʻljallangan sheriklik munosabatlar oʻrnatildi", - dedi Mirziyoyev.

Oʻzbekiston rahbari sessiya qatnashchilariga, xususan, mehmonlarga Oʻzbekiston hukumati aʼzolari, vazirliklar va idoralar hamda viloyatlar rahbarlari ushbu forumda kelishilgan loyihalarning hayotga tatbiq etilishida har tomonlama koʻmak beradilar, deya vaʼda berdi.

Mirziyoyev Oʻzbekiston hukumati aʼzolariga murojaat qilar ekan, "Sizlar bu forum - katta yoʻlning boshlanishi ekanligini tushunishlaringiz lozim. Agar biz bugun barcha shart-sharoitlarni mujassam qilsak, uchinchi davlatlar bozorlarini oʻzlashtirishga qaratilgan hamkorlikda amalga oshiradigan loyihalarimiz juda koʻp", - dedi.

Prezident shuningdek, Oʻzbekiston bugun Rossiya bilan hamkorlikda yangi strategik yoʻnalishni ochayotganini va bu - Rossiya Federatsiyasi bilan birgalikda atom energetikasini rivojlantirish sohasi ekanini qoʻshimcha qildi.

"Bu loyiha yangi klasterni shakllantiradi. Uning hayotga tatbiq etilishi - sanoat salohiyatining bundan keyingi taraqqiyotini belgilab beradi va mamlakat iqtisodiyotining turli jabhalarida yangi ish oʻrinlarini yaratadi", - deb qayd etdi Oʻzbekiston rahbari.

Mirziyoyev hamkasbi - Rossiya prezidenti Vladimir Putin bilan bunday forum har yili oʻtkazilishi kerak, degan toʻxtamga kelishgani haqida maʼlum qildi. Va bunday tadbir tizimli ravishda oʻtkazilsa, aniq natijalar ham kuttirib qoʻymasligiga ishonch bildirdi.

Putin: Rossiya Oʻzbekiston bilan birgalikda katta ishlarni amalga oshiradi

Rossiya prezidenti Vladimir Putin forumdagi nutqi davomida "Rossiya-Oʻzbekiston: birinchi mintaqalararo hamkorlik forumi" ishtirokchilarini qutlar ekan, bu hamkorlikning ham foydali ham istiqbolli yoʻnalishi ekanligini aytdi. Regionlar darajasida tarmoq otgan hamkorlik - toʻlaqonli ikkiyoqlama aloqalarning muhim koʻrsatkichidir, dedi Putin.

Vladimir Putin posetil ploщad Mustakillik
© Press-slujba prezidenta Uzbekistana.

"Shu bois, Shavkat Miromonovichning Toshkentda bunday forumni oʻtkazish borasidagi tashabbusini biz katta xayrixohlik bilan qoʻllab-quvvatladik. Rossiya qator davlatlar, avvalo, MDHga aʼzo mamlakatlar bilan bu singari formatda hamkorlik aloqalarini yoʻlga qoʻygan va bu aloqalar amaliyotda chindan oʻzining samaradorligini koʻrsatgan. Bu ish beradigan, jonli format. Rossiya-Oʻzbekiston formati ham buyogʻiga har yili oʻtkaziladi, Rossiya Federatsiyasining turli subʼyektlari va Oʻzbekiston oʻrtasida, birinchi galda, savdo-iqtisodiy sohalarda hamkorlikni rivojlantirishga salmoqli hissa qoʻshadi, deb umid qilamiz", - dedi Putin va mintaqalararo hamkorlik forumi doirasida nafaqat savdo-iqtisodiy, balki gumanitar sohada hamkorlikni rivojlantirish mumkinligini qoʻshimcha qildi.

Rossiya prezidenti shuningdek, Oʻzbekiston bilan ikkiyoqlama iqtisodiy aloqalar muvaffaqiyatli rivojlanayotganini qayd etdi.

2017 yil davomida ikki davlat oʻrtasida tovar ayriboshlash 34% oshgan boʻlsa, joriy yil yanvar-avgust oylarida bu koʻrsatkich yana 30%ga ortdi, Rossiya Federatsiyasi subʼyektlari va Oʻzbekiston viloyatlari oʻrtasidagi aloqalar tobora jadallashmoqda, hamkorlik yoʻnalishlari kengaymoqda. Joriy yilda regionlar rahbarlari 20ta javob tashriflarini amalga oshirdilar, Rossiya tomonidan, ayniqsa, Moskva, Peterburg, Orenburg va Chelyabinsk viloyatlari faollik koʻrsatdi.

"Bilamizki, Oʻzbekiston prezidenti sayi-harakatlari tufayli Oʻzbekiston viloyatlari rahbarlarining faolligi ortdi. Bu juda taʼsirchan natijalarni berishi mumkin. Forumda bir necha bor taʼkidlangan boʻlsa ham, takrorlab oʻtaman, ushbu tadbirda Rossiyaning 30 ta subʼyektidan 1000ga yaqin ishtirokilar qatnashmoqda. Ular orasida 10 nafar gubernatorlar va 850 nafardan ortiq biznesmenlar bor. Bu oʻzbekistonlik sheriklar bilan hamkorlikda jiddiy ish olib borishga tayyorligimizni bildiradi", - dedi Rossiya prezidenti. 

Prezident Rossii Vladimir Putin i prezident Uzbekistana Shavkat Mirziyoyev
© Sputnik / Ramiz Baxtiyarov
Prezident Rossii Vladimir Putin i prezident Uzbekistana Shavkat Mirziyoyev

Putin shuningdek, Rossiyada Oʻzbekiston qishloq xoʻjaligi mahsulotlari importi uchun eng qulay sharoitlar yaratilganini aytdi.

"Bojxona "yashil yoʻlagi" tizimi joriy etilgan, fito-sanitar nazorati boʻyicha maxsus tartib amaliyoti qoʻllaniladi, imtiyozli temir yoʻl tariflari amal qilib kelmoqda. Bularning barchasini oʻtgan yil Oʻzbekiston prezidentining Moskvaga amalga oshirgan tashrifi davomida muhokama qilganmiz. Va bu kelishuvlarning barchasi, koʻrib turganingizdek, hayotga tatbiq etilgan", - dedi u.

Putin ikki davlat oʻrtasidagi oʻzaro savdo va logistika boʻyicha ishlarni yanada optimallashtirish choralarini davom ettirish zarurligini qayd etdi. 

"Xususan, Oʻzbekistonga qaytayotgan transportni toʻldirish masalasini hal etish kerak, albatta, gap bu yerda Rossiya mahsulotlari, jumladan, oziq-ovqat mahsulotlari haqida bormoqda. Bu uchun imkoniyatlar yetarli. Rossiyada qishloq xoʻjaligi mahsulotlari ishlab-chiqarilishi soʻnggi 5 yil davomida 20%dan oshdi", - dedi Rossiya prezidenti va oʻtgan yil davomida don mahsulotlari hosildorligi "rekord" natija - 135 milliard tonnani tashkil etganini  qoʻshimcha qildi. 

Rossiya bugun dunyoda bugʻdoy yetkazib berish boʻyicha birinchi oʻrinda, don mahsulotlarini yetkazib berish boʻyicha ikkinchi oʻrinda turadi. Shuningdek, goʻsht eksporti boʻyicha ham koʻrsatkichlari tobora oshmoqda.

Putin Rossiya qayta ishlash yoʻnalishlari boʻyicha ham Oʻzbekiston bilan hamkorlikni yoʻlga qoʻyishi mumkinligini aytdi. "Forum doirasida oʻtkazilayotgan qishloq xoʻjaligi koʻrgazmasi yangi biznes-aloqalarni oʻrnatishga imkon yaratadi va hamkorlikdagi istiqbolli loyihalarni ochib beradi. Rossiya Oʻzbekistondagi katta yer egalarining sifatli qishloq xoʻjalik texnikasiga boʻlgan ehtiyojlarini toʻliq qondirishga hamda oziq-ovqat va qayta ishlash sanoatini modernizatsiya qilishda yordamlashishga tayyor", - dedi Putin va Rossiyaning qishloq-xoʻjalik mashinalari qurilishi boʻyicha eng yirik korxonalaridan biri - "Rosselmash" Oʻzbekistonda yem-xashak yigʻishtiruvchi kombaynlarni ishlab-chiqarish boʻyicha loyihani hayotga tatbiq etishga kirishganini aytdi.

Putin Rossiyaning boshqa ishlab-chiqaruvchilarida ham xuddi shunga oʻxshash rejalar borligini qoʻshimcha qildi. 

"Rossiya bundan keyin ham Oʻzbekiston agrar-sanoati majmualari uchun mutaxassislarni tayyorlashda koʻmaklashadi. Rossiya qishloq xoʻjaligi yoʻnalishidagi oliy taʼlim dargohlarida 800 ga yaqin oʻzbekistonlik talabalar tahsil olishmoqda. Kelgusi oʻquv yilida Toshkentda Astraxan universitetining agro-madaniyat fakulteti filialini tashkil etish koʻzda tutilgan", - dedi Rossiya prezidenti.

Putin Oʻzbekiston bilan hamkorlik aloqalarida qishloq xoʻjaligi - muhim rol kasb etishini, ammo aloqalar bu yoʻnalish bilan cheklanib qolmasligini qayd etdi.

"Oʻzbekiston va Rossiya hamkorligi uchun imkoniyatlar juda keng va ulardan koʻp natijalarni kutish mumkin. Va bugungi muzokaralarimiz yakuni ham buni isbotladi. Ishonchim komilki, regionlarimiz ikkiyoqlama sheriklik aloqalarini rivojlantirishda oʻz ishtirokini yanada faollashtiradi. Biz, Oʻzbekiston prezidenti bilan sizlarning barcha konstruktiv tashabbuslaringiz va yangi hamkorlikdagi loyihalaringizni qoʻllab-quvvatlab boramiz. Va men ham, Oʻzbekiston prezidenti singari sizlarga faqat ezguliklarni tilab qolaman. Ishingizga muvaffaqiyat tilayman", - deb oʻz nutqini yakunladi Vladimir Putin.

Sessiya yakunida Rossiya va Oʻzbekiston prezidentlari Markaziy Osiyoda birinchi boʻlgan va Oʻzbekiston iqtisodiyotining "lokomotivi" boʻlishi prognoz qilinayotgan AES qurilishi loyihasiga birgalikda start berdilar.

Mavzu:
Vladimir Putinning Oʻzbekistonga davlat tashrifi (31)

Asosiy mavzular