00:32 04 Dekabr 2020
Efir
  • RUB137.48
  • EUR12473.23
  • USD10427.38
Analitika
Havola olish
895 0 0

Moskvada qaysi sohalarda Rossiyaning boshqa mintaqalaridan kelgan fuqarolar ishga qabul qilinmoqda va ular mehnat migrantlari bilan raqobatlasha olishadimi? Batafsil Sputnik maqolasida.

TOSHKENT, 27 okt — Sputnik. Yoz oyida Rossiyada ishsizlik darajasi 6,3 foizni tashkil etdi. Bu 2019 yilning mos davriga qaraganda 1,9 foizga koʻproq. RIA Novostining 26 oktyabr kuni eʼlon qilgan tadqiqot maʼlumotlari shundan darak bermoqda.

85 ta subʼyektning 82 tasida ishsizlik oʻsishi qayd etilgan. Shu bilan birga Moskva ishga joylashish uchun jozibadorligicha qolmoqda.

Sputnik Moskvada qaysi sohalarda Rossiyaning boshqa mintaqalaridan kelgan fuqarolar ishga qabul qilayotgani va ular mehnat migrantlari bilan raqobatlasha olish yoki olishmasligini oʻrgandi.

Koronavirus pandemiyasi tufayli joriy etilgan cheklov choralari rossiyaliklar oʻrtasida ishsizlikning oshishiga olib keldi. Qolaversa, chegaralarning yopilishi qoʻshni mamlakatlardan mehnat resurslarining qisqarishiga sabab boʻldi.

Rossiya IIV maʼlumotlariga koʻra, 2020 yil yanvar oyidan may oyiga qadar Rossiyada chet el fuqarolariga 585 018 ta mehnat patenti berilgan. 2019 yilda xuddi shu davr oraligʻida 841 929 ta patent berilgan edi.

Qurilishlar

“Bu bahorda anʼanaviy ravishda Podmoskovyega keladigan migrantlar oʻrnini oʻzlariga ish topolmagan Rossiyaning boshqa mintaqalaridan kelgan rossiyaliklar egallashdi. Biroq shu bilan birga ularga xorijlik ishchilarga qaraganda koʻproq haq toʻlandi. Haq toʻlashni oshirishga yuzaga kelgan ishchi kuchi taqchilligi sabab boʻldi”, - dedi Rossiyaning “Stroitelstvo” (“Qurilish”) axborot agentligi bosh muharriri Aleksandr Gusev.

Ekspertning soʻzlariga koʻra, qurilishdagi mehnatlari uchun rossiyaliklar migrantlarga qaraganda oʻrtacha 30 foiz koʻproq haq olishmoqda.

Xorijlik ishchilar yetishmasligi haqidagi xabarni Moskva mintaqasidagi yirik quruvchi kompaniyalar ham tasdiqladi.

“Chegaralar yopilishiga kelsak, tabiiyki, bu odamlar, sifatli ishchi kuchi yetishmasligiga taʼsir koʻrsatadi. Natijada qurilish obʼyektlari bitkazilish surʼatiga taʼsir koʻrsatishi mumkin. Pudratchilar Rossiya mintaqalari boʻylab ishchilarni toʻplashga urinmoqda, lekin, afsuski, bu yetarli emas va muammo bugungi kunda hal etilmasdan qolmoqda”, - dedi Sputnik nashriga “Ingrad” KG vitse-prezidenti Grigoriy Zvenigorodskiy.

FSK yirik qurilish kompaniyasi matbuot xizmati ham sohada kadrlar yetishmasligini tasdiqladi.

“Bizda chegaralar yopilishiga qadar ham qurilishda koʻplab Rossiya fuqarolari ishlardi. Chegaralar yopilishi sabab, albatta, ularning soni oshdi. Hozir asosan Rossiya mintaqalaridan qurilish brigadalarini jalb qilmoqdamiz. Qurilish sohasida kadrlar yetishmasligini sezyapmiz”, - deya maʼlum qildi kompaniya vakili.

Taksi

Poytaxtda taksi haydovchilari haqiqatdan ham yetishmaydi, lekin migrantlarni rossiyalik haydovchilar bilan almashtirish bu sohada jiddiy oldinga siljish roʻy berishi dargumon. “Forum taksi” jamoatchilik harakati raisi Oleg Amosov shunday fikrni bildirdi.

“Koronavirusning birinchi toʻlqini vaqtida Rossiya mintaqalarida va megapolislarida taksi xizmatiga boʻlgan talabning qulashi 70-80 foizga yetardi. Yoz oyida biroz yaxshilanish kuzatildi. Bir oy ilgari taksi haydovchilarining pul topishi yaxshi edi. Agregatorlar haydovchilar yetishmayotgani haqida gapira boshlashdi. Lekin hozir, ikkinchi toʻlqin bilan buyurtmalar soni kamayishi qayd etildi. Hozirda poytaxt ofislarining 30 foiz xodimlari masofaviy ishlashga joʻnatib yuborilgan. Tabiiyki, ular ishga borib kelishmaydi”, - deya tushuntirdi Amosov.

Moskvaning “Best” taksoparki ham boshqa mamlakatdan kelgan haydovchilar soni qisqargani haqidagi xabarni tasdiqladi.

“Hozirda Qozogʻiston, Qirgʻiziston, Belarusdan keladigan chet ellik haydovchilar soni kamaydi. Koronavirus tufayli safarlar ham kamaymoqda, yetarlicha buyurtmaga ega boʻlmasdan avtomobil uchun ijara toʻlashning nafi yoʻq. Moskvalik haydovchilardan umid qilish qiyin. Ular goh kelib, goh ketishadi”, - deya maʼlum qildi kompaniya vakili.

Dmitriy Poletayev
© Foto : Iz lichnogo arxiva Dmitriya Poletayeva

Boshqa sohalar

Umumiy ovqatlanish sohasiga rossiyaliklarning yogʻilib kelishi kutilmayapti. Bu haqda Sputnik agentligiga Restoratorlar, otelyerlar federatsiyasi prezidenti Igor Buxarov maʼlum qildi.

“Qator umumiy ovqatlanish muassalari hozir zoʻrgʻa ishlayapti, shuning uchun ishchilar koʻp kerak emas. Rossiyaliklar oshpaz, qandolatchi boʻlib ishlashni istashmaydi. Bu ogʻir ish. Pul ularni qoniqtirishi mumkin. Lekin bu qadar ish haqiga boshqa, yengilroq ishni topish mumkin”, - deydi Buxarov.

“Chayxona №1” restoranlar tarmogʻi oʻtgan yilga qaraganda ishchi olishda oʻzgarishlar yoʻqligini maʼlum qildi.

Bir martalik ishlarda pul ishlashni xohlayotgan Rossiyaning boshqa mintaqalari aholisi soni oshmoqda. Bu haqda “YouDo” servisi asoschilaridan biri Denis Kutergin maʼlum qildi.

“Toʻrtinchi chorakda oʻsish surʼati kuzatilmoqda. Birinchi toʻlqindan keyin juda koʻp ishchilar ketib qoldi, yozda Moskvada ishchilar yetishmasligi yuzaga keldi. Barcha sektorlarda. Hozir har hafta Rossiyaning boshqa viloyatlaridan kelayotganlar hisobi 5-10 foizga oʻsish boʻlmoqda”, - deya tushuntirdi Sputnik suhbatdoshi.

Eltib berish (kuryerlik) sohasida koronavirus pandemiyasi vaqtida oʻsish qayd etildi. “Delivery Club” servisi matbuot xizmatining Sputnik agentligiga maʼlum qilishicha, har hafta kuryer boʻlib ishlashni xohlovchilardan kelib tushayotgan arizalar soni taxminan 17 foizga oshgani kuzatilmoqda. Ammo ular xohlovchilarning fuqaroligi haqidagi savolga javob berishga qiynalishdi.

Moskva va Moskva viloyatida eltib berish xizmatini amalga oshiruvchi “Dostavista” xizmati vakili pandemiya vaqtida kuryer boʻlib ishlashni xohlovchilar soni oshganini maʼlum qildi. Shu bilan birga rossiyaliklar hisobiga.

“Kompaniyamiz bilan hamkorlik qiluvchi kuryerlar orasida Moskva va Podmoskovye aholisi hamisha bor edi. Bahordagi oʻzini oʻzi yakkalash davrida xizmatimiz bilan hamkorlik qiluvchilar soni ancha koʻpaydi, chunki ayrimlar doimiy daromad manbaidan mahrum boʻldi. Biz esa kuryerlarga nafaqat doimiy daromad, balki Moskva boʻylab harakatlanishni taqdim etdik”, - dedi maʼlum qildi kompaniya vakili.

Mehnat migrantlarini oʻrnini toʻliq rossiyalik kadrlar bilan toʻldirish haqida gap ketmayapti. Bunga iqtisod fanlari doktori, RANXiGS  professori Aleksandr Sherbakovning ishonchi komil.

“Odatda migrantlarga ish beruvchilar ijtimoiy toʻlovlarni toʻlamaydi. Qolaversa, ularning mehnati rossiyaliklarga qaraganda arzonga tushadi. Rossiya aholisi buning barchasiga rozi ham boʻlavermaydi, chunki kam ish haqi ularning talablarini qondira olmaydi. Migrantlar yutib chiqadigan unchalik toʻgʻri boʻlmagan raqobat yuzaga keladi. Chegaralar yopilishi va epidemiologik xavfsizlik choralari yaqin kelajakda jiddiy oʻzgarishlarga olib kelishi dargumon, zero COVID-19 bilan bogʻliq cheklovlar bir kun kelib yumshatiladi. Hammasi joyiga tushadi”, - deya aniqlik kiritdi mutaxassis.

Asosiy mavzular