18:57 30 Noyabr 2020
Efir
  • RUB136.69
  • EUR12344.73
  • USD10414.86
Kolumnistlar
Havola olish
119230

Shotut sirkasi qonni suyultirish yordamida koʻplab kasalliklarga shifo boʻlishi mumkinmi? Biz ushbu shifobaxsh sharbatni qayta kashf qilgan mutaxassis bilan muloqotda boʻldik.

TOSHKENT, 23 okt – Sputnik. Soʻnggi vaqtlarda Oʻzbekiston OAVlarida shotut sirkasining shifobaxsh xususiyatlari, undan infarkt, insult va hatto koronavirusga chalingan bemorlar shifo topayotgani haqida koʻplab maʼlumotlar paydo boʻlmoqda. Shuningdek, juda koʻp odamlar shotut sirkasini sotib olib isteʼmol qilishayotgani haqida ham eshitmoqdamiz.

Ushbu mavzuda batafsil va aniq maʼlumot olish uchun Sputnik Oʻzbekiston muxbiri kimyo fani mutaxassisi — Gʻaniyev Shukuriddin Toʻxtayevich bilan muloqotda boʻldi.

- Shukuriddin Toʻxtayevich, tabiiy shotut sirkasining foydali xususiyatlari haqida qisqacha toʻxtalib oʻtsangiz?

- Abu Ali Ibn Sino yozib qoldirgan risolalarga tayansak, shotut sirkasining foydali xususiyatlari haqida koʻplab foydali maʼlumotlar keltiriladi.

Yaʼni ushbu sharbat, bosh miya ichki bosimining normal holatda boʻlishini taʼminlaydi, infarkt va insult xastaliklarining oldini oladi, qon tomirlarining quvvatini oshiradi, inson salomatligini tiklashda muhim oʻrin tutadi. Qonni suyultirib, qon tomirlaridagi "tromb", "izgib" va tugunlarni yechib yuboradi. Mayda tomirlarni kengaytirib organizmda qon aylanishini yaxshilaydi.

Qon tomirlaridagi xolestirin va qand moddasini normaga yaqin holatga keltiradi. Qon bosimini "ishchi" holatida ushlab turadi. Qondagi qand moddasini 7-8 dan oshib ketishiga yoʻl qoʻymaydi. Qolaversa, V1, V2, V6, S, RR vitaminlari, kaltsiy, magniy, temir kabi mikroelementlarga ega boʻlgan bu sirkaning oshqozon va ichaklarga ziyon yetkazmasligi uchun unga maxsus ishlov berilgan va uning xushtaʼm boʻlishi taʼminlangan.

- Shotut sirkasi koronavirusni davolashda yordam beradimi?

- Shotut sirkasi koronavirusni yengishda vrach tavsiya etgan dorilarning oʻrnini bosmaydi, aksincha, qon suyuq holatga keltirilgandan keyin, vrach tavsiya etgan dorilarning yaxshi taʼsir etishiga xizmat qiladi.

Natijada siz sogʻligingizni tezroq tiklab olasiz. Ishtahangiz ochilib, ovqatlarni yaxshi xazm qilasiz, uyqusizlikdan qiynalmaysiz, yaxshi uxlaysiz.

- Siz ushbu sharbatning foydali xususiyatlari haqida qanday bilib oldingiz?

- Shotut sirkasini pandemiya vaqtida emas, ilk marotaba 2006 yilda sogʻligim yomonlashgani bois avval oʻzim tayyorlab ichib koʻrganman.  Oʻsha yili kutilmaganda insult boʻlib qoldim, bolalarim ovqatlantirib, yetaklab yurdi. Muolajalar davrida menga qon suyultiruvchi barcha dorilarning kuchi yetmaganligi uchun, oʻzim mustaqil ravishda tabiiy dorivor vositalar  orqali tuzalish chorasini izladim. Abu Ali Ibn Sinoning kitoblarida sirkaning inson salomatligi uchun foydali ekanligi haqida oʻqidim va uni oʻzim mustaqil tayyorlashga urinib koʻrdim.

Xullas, ikki marotaba infarkt, bir marotaba insultni boshdan kechirgach, maxsus koʻrsatmaga amal qilgan holda oʻzim tayyorlagan shotut sirkasini isteʼmol qilib, tomirlarimdagi qonni suyultirib oldim va tez fursatda tuzaldim.  Qon bosimim esa 110 / 70 boʻlib, normal holatga keldi. Boʻyin va bosh tomirdagi tromblar tozalanib, quloq shangʻilashi, bosh ogʻrigʻidan xolos boʻldim. Havodagi oʻzgarishlar, "magnit boʻronlar"i ham qon bosimimga taʼsir qilmaydigan boʻldi. Butun tanadagi tomirlarim tozalangach, organizmimdagi qand moddasi ham normal holatga tushdi.

Qon bosimimning ishchi holati sakramaydigan boʻldi. Shifokorlar esa mendagi ijobiy natijalarni koʻrib xayron qolishdi. Shundan kelib chiqib, men ushbu tabiiy shotut sirkasini yaqin qarindoshlarim, quda-andalarga tavsiya etdim. Bugungacha, turli kasallik bilan ogʻrigan bemorlar ushbu shotut sirkasini isteʼmol qilib, shaxsan uning davolash xosiyatlariga ixlos qilishmoqda. Bugungi kunda Afgʻoniston, Hindiston, Rossiya davlatlaridan shotut sirkasini soʻrab kelishyapti.

- Shotut sirkasini isteʼmol qilish mumkin boʻlmagan, tavsiya etilmagan  holatlar ham bormi?

- Yodda saqlash zarurki, bemorlar tezroq tuzalish ishtiyoqida shoshma-shosharlik qilishlari salbiy oqibatlarga olib kelishi mumkin. Masalan, shotut sirkasini och qoringa ichib ovqatlanmasdan yurish mumkin emas. Shuningdek, oshqozoni xasta kishilarning ichishi yoki iliq holda, qaynatib ichish mumkin emas.

Ichish tartibiga rioya qilmasdan shotut sirkasini isteʼmol qilgan bemorning qoni haddan tashqari suyulib ketishi, biron jarohat olganda qonni toʻxtata olmay qiynalib qolishi mumkin. Shundan kelib chiqib koʻp yillik kuzatuvlar natijasida ushbu grafik tuzilgan. Bundan tashqari 1 osh qoshiqdan koʻp ichish oshqozon shirasining koʻpayib ketishiga sabab boʻlishi mumkin. Shu bois bu boʻyicha maxsus grafik va  foydalanish koʻrsatmalariga rioya qilish nihoyatda shart! 

Yana bir bor takrorlab aytaman, shotut sirkasi vrach sizga tavsiya qilgan dori-darmon vazifasini bajarmaydi. Aksincha, qonni  suyultirib tozalagandan soʻng dori taʼsir qilmayogan boʻlsa, shotut sirkasidan koʻrsatmaga amal qilgan holda isteʼmol qilsa yaxshi foyda koʻrsatadi va insonning oʻz sogʻligini tezroq tiklab olishiga yordam beradi.

Sogʻliqni saqlash vazirligi nima deydi

Sputnik muxbiri Oʻzbekiston Sogʻliqni saqlash vazirligiga qoʻngʻiroq qilib, shotut sirkasining keng jamoatchilik orasida isteʼmol qilinayotgani borasida izoh oldi.

Vazirlikning litsenziyalash boshqarmasi mutaxassisi Botir Omonovning aytishicha, vazirlik tarkibida hozircha tabiblar uyushmasi tashkil etilmagan, shu bois ishonch telefonlari ham ishga tushganicha yoʻq, ammo shotut sirkasining foydali jihatlari, uni isteʼmol qilish inson salomatligi uchun muhim ahamiyatga egaligi haqida vazirlik xabardor.

"Shotut qancha koʻp isteʼmol qilinsa shuncha yaxshi. Modomiki, jamoatchilik ushbu shotut sirkasini isteʼmol qilib, salomatligini tiklab olayotgan ekan, buni Sogʻliqni saqlash vazirligining bilishi yoki nazoratga olishining ahamiyati yoʻq", - dedi suhbatdosh.

Shuningdek, Sogʻliqni saqlash vazirligi shotut sirkasining keng jamoatchilik tomonidan isteʼmol qilinayotganligiga hech qanday moneʼlik qilmaydi. Chunki shotutning zararli tomoni yoʻq, shotut sirkasi bozorlarda ham sotilyapti, deb qoʻshimcha qiladi Omonov.

Sputnik tahririyati shotut sirkasi yordamida davolanmoqchi boʻlgan oʻquvchilarga - har qanday vositadan shifokor maslahatidan soʻng foydalanishni tavsiya etadi. Oʻz-oʻzini davolash har doim ham yaxshi natijaga olib kelmasligi mumkinligi haqida yana bir bir eslatib oʻtadi. 

Asosiy mavzular