TOShKENT, 26 fev — Sputnik. "Ikat" uslubidagi ko‘hna to‘quvchilik hunari avloddan avlodga mo‘’tabar omonat o‘laroq o‘tib kelayotgan bebaho madaniy boyligimiz sanaladi. Betakror va benazir ipakchilik maktabi asrlar davomida nash’u namo topdi.
Abrbandi uslubidagi bezak, timsol va naqshu nigorlar mohir musavvir asari kabi maftunkor. Qolaversa, ularda o‘zbek zaminida umrguzaronlik qilayotgan hunarpesha xalqning olamni, odamni anglash bilan bog‘liq ko‘hna tasavvurlari mujassamdir.
O‘zbek hunarmandlari Sharq uyg‘onishidan bugungi davrgacha favqulodda ko‘rkamlik va mukammallik, yuksak did va madaniyat ila dunyoni lol etib kelmoqda. An’anaviy milliy san’at deya e’tirof etilgan ushbu ko‘hna hunar turfa tamaddun va xalqlarning tarixiy-madaniy qadriyatlarini uyg‘unlashtirgan holda, Ipak yo‘li bo‘ylab zamon va makonlar osha "sayohati"ni davom ettirayotir.
Milliy hunarmandlar o‘zbek xalqining chinakam madaniy boyligi — ipakchilik usullari va an’analarini ko‘z qorachig‘idek asrab-avaylab kelayotgani tahsinga sazovor.
XXI asrda bu nodir hunar tarixida uyg‘onish davri, gulgun fasl boshlangani rost bo‘lsin!"
