TOSHKENT, 21 fev — Sputnik. “Oʻzbekkino” MA buyurtmasiga binoan suratga olingan "Rangsiz tushlar” filmi joriy yilning 19 mart - 3 aprel kunlari boʻlib oʻtadigan Markaziy Osiyoning bahorgi festivalida ishtirok etadi. Bu haqda agentlik matbuot xizmati xabar qilmoqda.
Festival tashkilotchisi Koreya va Markaziy Osiyo hamkorlik forumi KF kotibiyati hisoblanadi. Festivalda Navroʻz haqidagi qisqa metrajli hujjatli filmlarga bagʻishlangan tadbirlar, Markaziy Osiyo kinohaftaligi, K-pop tanlovi va boshqa tadbirlar boʻlib oʻtishi rejalashtirilgan.
Rejissyor Ayub Shahobiddinov suratga olgan “Rangsiz tushlar” filmida qamoqdan soʻng ozodlikka chiqqan ayol Kashmiraning jamiyatga moslashishida duch kelgan qiyinchiliklari haqida hikoya qilinadi. “Rangsiz tushlar” filmi Anapadagi "Kinoshok", Qozonning musulmon kinolari festivali, shuningdek, Armanistondagi "Freska" va Italiyaning "Lukaniya" va "Asiatica Film Festival XXI", Indoneziyaning XV Jogja-NETPAC Asian Film Festival ( JAFF ) festivallarida ham ishtirok etgan.
