GM Uzbekistan ishlab chiqarilishi to‘xtatilgan avtomobillar haqida xabar qildi

TOShKENT, 17 apr — Sputnik. GM Uzbekistan aksiyadorlik jamiyati o‘zining facebookdagi sahifasida Tico, Epica va Nexia 2 ishlab chiqarilishi borasida kelib tushgan ko‘p sonli murojaatlarga javob qaytardi.

"Tico, Epica va Nexia 2 avtomobillarini ishlab chiqarish bilan bog‘liq bo‘lgan ko‘p sonli murojaatlar tufayli GM Uzbekistan aksiyadorlik jamiyati Tico — 2004-yilda ishlab chiqarishdan olingan, Epica ishlab chiqarilishi 2012-yilda to‘xtatilgan, Nexia 2 ishlab chiqarilishi esa 2016-yilning 1-avgustida to‘xtatilganini ma’lum qiladi", — deyiladi xabarda.

Xabarda aytilishicha, 2008-yilda iste’molchilar afzalliklari va bozor talablaridan kelib chiqqan holda Nexia avtomobili modernizatsiyasi amalga oshirilgan.

Nexia 2 avtomobilining ishlab chiqarilishi to‘xtatilishi — yangi ekologik standartlar va xavfsizlik tizimlari uchun yangi talablar joriy etilishi bilan bog‘liqligi ta’kidlangan.

"Avtomobillarning model qatorlari, modifikatsiyalari, opsiyalari va narxlaridagi har qanday o‘zgarishlar haqida GM Uzbekistan o‘z rasmiy saytida va Feysbukdagi sahifasi orqali oldindan xabardor qilib boradi", — deb qo‘shimcha qilingan xabarda.