07:27 26 Sentyabr 2020
Efir
  • RUB136.28
  • EUR12210.60
  • USD10315.62
Iqtisod
Havola olish
129 0 0

Oʻzbekiston YAIMining 60% - kichik biznes tomonidan yaratiladi, lekin bugungi kunda tadbirkorlar koʻplab muammolarga duch kelmoqda, jumladan maʼmuriy toʻsiqlarga ham.

TOSHKENT, 24 iyul – Sputnik. Viloyat va tuman hokimlari va ularning oʻrinbosarlariga hududda tadbirkorlik naqadar yaxshi rivojlanayotganiga qarab baho beriladi, dedi prezident kichik biznes va tadbirkorlikni rivojlantirishga bagʻishlangan videoselektor yigʻilishida.  

– Faqat katta korxonalar qurib, aholi bandligini va daromadini oshirish, byudjet tushumlarini koʻpaytirish masalalarini toʻliq hal eta olmaymiz. Turmush darajasini oshirishning eng muhim yoʻli tadbirkorlik va kichik biznesni rivojlantirishdir, – dedi Shavkat Mirziyoyev. 

Har bir viloyat, tuman va shahar hokimlari va ularning birinchi oʻrinbosarlari faoliyatiga yangi tashkil etilgan yoki faoliyati qayta tiklangan kichik korxonalar va ularda yaratilgan ish oʻrinlari sonidan kelib chiqqan holda baho berib, ragʻbatlantirish boʻyicha yangi tizim joriy etish vazifasi qoʻyildi, deyilgan xabarda.

Baho berishda korxonalarning yashovchanlik koʻrsatkichi asosiy mezonlardan biri boʻlishi kerakligi belgilandi. Yaʼni, tashkil etilayotgan korxonalarning kamida 50 foizi keyingi 3 yil davomida ishlasa, hokim va uning tadbirkorlik boʻyicha birinchi oʻrinbosari, Savdo-sanoat palatasining hududiy boʻlimlari rahbarlarini qoʻshimcha moddiy ragʻbatlantirish nazarda tutilmoqda. 

Shuningdek, Vazirlar Mahkamasi, Adliya vazirligi, Iqtisodiyot va sanoat vazirligiga ushbu yangi tizimni joriy qilish boʻyicha koʻrsatmalar berildi. 

Maʼlumki Oʻzbekiston YAIMining 60% - kichik biznes tomonidan yaratiladi. Sanoat mahsulotining 3/1 qismi, qishloq xoʻjalik mahsulotlarining 98 % - kichik biznes tomonidan yaratiladi. Shuningdek, kichik biznes investitsiyalarning 50 %ini va ayrim sohalarda eksportning 70-90 %ini taʼminlaydi.

Asosiy mavzular