TOShKENT, 1 apr — Sputnik. O‘zbekistonda alkogol, benzin va gaz aksiz solig‘i yil oxiriga qadar oshirilmaydi. Bu haqda Moliya vazirligi matbuot xizmati xabar qildi.
“Qabul qilingan qarorga asosan joriy yil oxiriga qadar spirt, alkogol mahsulotlari, shu jumladan vino va pivo, shuningdek, yakuniy iste’molchiga sotiladigan benzin, dizel yoqilg‘isi hamda suyultirilgan va siqilgan gazga amaldagi aksiz soliq stavkalari saqlanib qolinishi belgilandi”, - deyilgan xabarda.
Eslatib o‘tamiz, 2020-yil uchun O‘zbekiston Davlat budjeti to‘g‘risidagi qonuniga asosan joriy yilning 1-aprelidan boshlab aksiz soliq stavkalarining oshirilishi ko‘zda tutilgan edi.