TOShKENT, 24 sen — Sputnik. Xitoyning “Shanghai Electric Power Transmission & Distribution” kompaniyasi 500 kVli G‘uzor – Regar (L-507) elektr uzatish tarmog‘ini tiklash xalqaro tender tanlovida g‘olib bo‘ldi. Bu haqda Energetika vazirligi matbuot xizmati xabar qilmoqda.
“Loyiha doirasida 500 kVli G‘uzor – Regar (L-507) elektr uzatish tarmog‘ining O‘zbekiston Respublikasi hududidagi 63 kilometr uzunlikdagi qismi qayta quriladi”, - deyilgan xabarda.
Loyihaning dastlabki qiymati 25 million dollarni tashkil etadi.
Ta’kidlanishicha, loyiha Tojikiston va O‘zbekiston o‘rtasidagi savdo-iqtisodiy hamkorlik bo‘yicha hukumatlararo komissiyasi bayonnomasi asosida amalga oshirilmoqda.
