TOShKENT, 12 sen — Sputnik. Samarqand shahrida oltimish yoshdan oshgan yashirin ravishda diniy ta’lim berib kelgan ayollar sud hukmi bilan jarimaga tortildi, deb xabar qildi "Zarafshon" nashri.
Shu tariqa Halima opaning xonadoniga Samarqand shahrining turli mahallalarida istiqomat qiluvchi Aziza, Maxfuza, Nurxon, Alina, Umida singari 25-30 yoshdagi ayollar kelishgan.
Otinoyilardek viqor bilan so‘z boshlagan Halima opa dastlab Allohning yagonaligi, Yaratganni doimo yodda tutmoq uchun diniy bilimlar zarurligini uqtirib, ma’rakalar o‘tkazib, xayr-ehson qilish savobligini ta’kidlagan, deb yozadi nashr.
Davlat diniy ta’lim muassasasida tahsil olmagan, kishilarga diniy ta’limot berishga tegishli organning ruxsatisiz "diniy marosim" o‘tkazayotgan bu ayol ilgari ham ogohlantirilgan, ammo xudbinlik, o‘zboshimchalik bilan keksaligini pesh qilib, yana ayollarni yig‘gan.
Oqibatda "yaxshi niyat"da boshlagan xufona ishi boshiga balo keltirdi. H.Sayfiyeva va uning sheriklari ma’muriy huquqbuzarlar sifatida huquq-tartibot idoralari tomonidan qayd etildi.
Ma’muriy huquqbuzarlikka yo‘l qo‘ygan yetti nafar ayol ishini ko‘rib chiqish joyi va vaqti haqida chaqiruv xati orqali xabar qilingan bo‘lsa-da, ular sud majlisiga kelmagan. Ma’muriy javobgarlik to‘g‘risidagi Kodeksning 294-moddasiga asosan ma’muriy ish ular ishtirokisiz ko‘rib chiqilgan.
Halima Sayfiyeva, Natalya Pak, Aziza Kamolova, Maxfuza Asrorova, Nurxon Kamalova, Alina Kenjayeva va Umida Otamurodovalar aybdor deb topilib, sud qarori bilan jarimaga tortilgan.
