TOShKENT, 14 mar — Sputnik. Samarqandlik ayol Amerikaga yuborish bahonasida buxorolik erkakning 10 ming dollar pulini olib, o‘z ehtiyojlari uchun ishlatib yubordi, deb xabar bermoqda O‘zbekiston IIV matbuot-xizmati.
Xabarda aytilishicha firibgarlik holati haqida ariza Samarqand shahar IIBga 12-mart kuni kelib tushgan.
Hujjatga ko‘ra, 2016-yil iyul oyida samarqandlik, 1962-yilda tug‘ilgan M.Ro‘ziyeva o‘zi yashaydigan mahalla hududida Buxoro shahrida yashovchi, 1973-yilda tug‘ilgan S.Ergashevga AQShga yuborish taklifini bildiradi.
Ayol bu ishni Rossiya Federatsiyasida joylashgan turizm firmasi orqali amalga oshirishini aytib, Ergashevning 10 ming AQSh dollarini oladi.
Mazkur holat yuzasidan M.Ro‘ziyeva qo‘lga olingan. Tergov davomida ayol pullarni o‘z ehtiyojlari uchun ishlatib yuborganligi ma’lum bo‘lgan.
