TOShKENT, 30 apr – Sputnik. Bandlik va mehnat munosabatlari vazirligi Tula viloyatining Uzlovaya shahridagi “Paterochka” supermarketida pichoqlangan ayolning shaxsi yuzasidan ma’lumot berdi.
Xabarda aytilishicha, 28-aprel kuni Tula viloyatining Uzlovaya shahridagi “Paterochka” supermarketida rossiyalik 34 yoshli Andrey.K 33 yoshli Umida ismli kassir ayolga hujum qilib, pichoq bilan 20 ga yaqin jarohat yetkazgan. Ayol kasalxonada hayotdan ko‘z yumgan.
Aniqlanishicha, jabrlangan ayol 1986-yilda tug‘ilgan asli o‘zbekistonlik, ammo hozirga qadar Rossiya fuqaroligida bo‘lgan Umida Zurayevna Egamurotova ekanligi tasdiqlandi. Jinoyatchi qo‘lga olingan.
“O‘zbekiston Respublikasi Bandlik va mehnat munosabatlari Vazirligi Umida Egamurotovaning oila a’zolariga chuqur ta’ziya izhor etadi. Shuningdek, marhuma Rossiya Federatsiyasi fuqarosi bo‘lishiga qaramasdan, vatandoshimiz sifatida tashkiliy masalalarda kerakli amaliy yordamini ko‘rsatishga tayyor ekanligini bildiradi”, - deyilgan xabarda.
