TOShKENT, 28 yanv — Sputnik. Jizzaxda sevgan qiziga nisbatan tovlamachilik sodir etgan yigit jinoyat ustida qo‘lga olindi.
IIV huzuridagi Tergov departamenti xabariga ko‘ra, Sharof Rashidov tumanida yashovchi 19 yoshli qiz Jizzax viloyat IIB boshlig‘i nomiga ariza bilan murojaat qilgan. U o‘z arizasida o‘zaro tanishib yuradigan 22 yoshli yigiti telefonidan sezdirmasdan shaxsiy suratlarini yashirincha ko‘chirib olgani va ularni internetdagi ijtimoiy tarmoqlarda tarqatib yuborish bilan tahdid qilayotganini bayon qilgan.
Qizning so‘zlariga ko‘ra, yigit suratlarni tarqatmaslik evaziga 10 ming dollar talab qilgan. Shuning uchun qiz yigitiga nisbatan qonuniy chora ko‘rishni so‘ragan.
O‘tkazilgan tezkor tadbirda B.B. 25 mln so‘mni olayotgan vaqtida qo‘lga olingan.
Unga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
