TOShKENT, 27 fev – Sputnik. Andijonda tibbiyot instituti talabalari kuchli ta’sir qiluvchi dori vositalarining noqonuniy savdosi bilan shug‘ullanayotganlarida qo‘lga olindi. Bu haqda Bosh prokuratura matbuot kotibi ma’lum qilmoqda.
Qayd etilishicha, Bosh prokuratura huzuridagi Departamentning Farg‘ona viloyati boshqarmasi tomonidan DXX va IIB xodimlari bilan hamkorlikda tezkor tadbir o‘tkazilgan.
Unda Andijon davlat tibbiyot instituti uch nafar talabalari xaridorga jami 1 000 dona kuchli ta’sir qiluvchi “Tropikamid” dorisini 45 mln. so‘mga sotayotgan vaqtlarida ushlanganlar.
Shu kabi o‘tkazilgan yana bir tadbir vaqtida fuqaro K.M. va M.A.lar xaridorga jami 2 625 dona “Tropikamid” dorisini 105 mln. so‘mga sotayotganliklari aniqlanib, qo‘lga olingan.
Ularning yonidan jami 8 000 dona “Tropikamid” dori vositalari ashyoviy dalil sifatida olib qo‘yilgan.
Hozirda mazkur holatlar bo‘yicha JKning tegishli moddasi bilan jinoyat ishlari qo‘zg‘atilib, tergov harakatlari o‘tkazilmoqda.
