TOShKENT, 17 mar - Sputnik. “Facebook” internet ijtimoiy tarmog‘ida Milliy gvardiya xodimlaridan qochgan va 2 hafta o‘tgach jasadi topilgan fuqaro haqida xabar tarqaldi. Bosh prokuratura matbuot kotibi ushbu hodisa yuzasidan surishtiruv o‘tkazilayotganini ma’lum qildi.
Xabarda yozilishicha, “Facebook” internet ijtimoiy tarmog‘ida joriy yilning 14-fevral kuni Toshkent shahar, Yakkasaroy tumani, Sharshara ko‘chasida Milliy gvardiya xodimlari bir nafar huquqni muhofaza qiluvchi idora xodimi deb taxmin qilinayotgan shaxsning ortidan quvganligi, so‘ng u o‘zini Bo‘rijar kanaliga tashlaganligi va oradan 2 hafta o‘tgach ushbu kanaldan uning murdasi topilganligi haqidagi xabar tarqalgan.
Hozirda mazkur holat yuzasidan prokuratura organlari tomonidan tergovga qadar tekshiruv harakatlari o‘tkazilmoqda.
