04:40 02 Iyun 2020
Efir
  • RUB121.10
  • EUR10637.67
  • USD9554.22
Hodisalar
Havola olish
444 0 0

Prezident Sardoba suv ombori toʻgʻoni ochilgan joyga borib, uni koʻzdan kechirdi, mutaxassislar bilan muhokama qilgan holda suv oqimini toʻxtatish uchun zarur kuch va vositalar jalb qilindi.

TOSHKENT, 1 may - Sputnik. Shavkat Mirziyoyev Sirdaryo viloyatiga tashrif buyurib suv toshqini tufayli evakuatsiya qilingan oilalar bilan uchrashdi, deb xabar qilmoqda prezident matbuot xizmati.

Uchrashuv chogʻida prezident ofatdan jabrlangan har bir inson alohida eʼtiborga olinishi, hamma uy-joy va oziq-ovqat bilan taʼminlanishini taʼkidladi.

– Bu hech kim kutmagan sinov. Birinchi harakatimiz odamlarni ehtiyot joylarga koʻchirish boʻldi. Eng katta masala – oʻlim boʻlmasligi. Oqsoqollar, mahalla raislari va nozirlaridan iltimos qilaman: odamlarni yigʻib, uylarga, palatkalarga joylashtirib, oziq-ovqat bilan taʼminlab, mahallama-mahalla saranjom qilib olishimiz kerak. Buning uchun hamma kuch va vositalarni safarbar qilamiz. Sharoit yaxshi boʻlmaguncha bironta rahbar ketmaydi. Sabr qilib, ogʻirlikni yelkamizga olib, chidashimiz kerak. Bironta xonadon, bironta odam eʼtiborsiz qolmaydi, – dedi Shavkat Mirziyoyev.

Bugun erta tongda "Sardoba" suv ombori toʻgʻonining bir qismi oʻpirilib, bir necha aholi punktlari, kommunikatsiya tarmoqlari va qishloq xoʻjaligi maydonlariga zarar yetkazgan edi.

Tabiiy ofat haqida maʼlum boʻlganidan soʻng, prezident zudlik bilan voqea joyiga yetib keldi. Hukumat komissiyasi tashkil etilib, favqulodda vaziyat oqibatlarini bartaraf etish, aholini xavfsiz hududlarga evakuatsiya qilish va ularga har tomonlama yordam berish boʻyicha barcha chora-tadbirlar koʻrildi.

Tezkor chora-tadbirlarga Favqulodda vaziyatlar vazirligi, Suv xoʻjaligi vazirligi, mahalliy hokimliklar, qurilish-taʼmirlash tashkilotlari, huquq-tartibot idoralari va boshqa xizmatlar mutaxassislari safarbar etildi. Suv ombori yaqinidagi mahallalar aholisi Sirdaryo va Jizzax viloyatlaridagi xavfsiz hududlarga evakuatsiya qilindi.

Shuningdek, Mudofaa vazirligi, Ichki ishlar va Milliy gvardiya shaxsiy tarkibi va maxsus texnikalari aholini evakuatsiya qilish va tegishli xoʻjalik obʼyektlarini jihozlash uchun va evakuatsiyaga koʻmaklashish hamda tartibni saqlash ishlariga jalb etildi.

Prezident Shavkat Mirziyoyev Sardoba suv ombori toʻgʻoni ochilgan joyga borib, uni koʻzdan kechirdi. Hukumat komissiyasi va mutaxassislar bilan muhokama qilgan holda suv oqimini toʻxtatish uchun zarur kuch va vositalar jalb qilindi.

Hozirda toʻgʻondan suv chiqishi toʻxtagan. Toshgan suv oqimi Oqoltin tumanidan oʻtuvchi Abay kanaliga tushirilib, Jizzax viloyatidagi Arnasoy koʻliga yoʻnaltirilgan. Prezident vaziyatni shaxsiy nazorat ostiga olgan. 

 

Asosiy mavzular