09:50 22 Oktyabr 2020
Efir
  • RUB133.19
  • EUR12153.63
  • USD10371.76
Hodisalar
Havola olish
129 0 0

Kelishmovchilik ikki guruh yigitlari orasida kelib chiqqan. 8 kishidan iborat boʻlgan birinchi guruh orasida ikki nafar qiz ham boʻlgan.

TOSHKENT, 22 sen — Sputnik. Toshkent shahar IIBB Yunusobodda tungi klub yonida yuz bergan pichoqbozlik yuzasidan qoʻshimcha tafsilotlarni taqdim etdi.

Xabarda yozilishicha, 20 sentyabr kuni ertalab soat 6:00 atrofida patrul-post xizmati xodimlariga Amir Temur koʻchasidagi tungi klub yonida mushtlashuv yuz bergani haqida maʼlumot kelib tushgan. Xodimlar voqea joyiga yetib kelganida pichoq bilan yaralangan toʻrt nafar yigitdan biri – 18 yoshli A.G. voqea joyining oʻzida hayotdan koʻz yumgani oydinlashgan. Uch nafar yigit shifoxonaga yetkazilgan. Shifoxonada janjalda ishtirok etganlardan yana biri – 23 yoshli D.S. ham hayotdan koʻz yumgan. 21 yoshli A.A. va 28 yoshli A.T. ayni vaqtda shifoxonaga joylashtirilgan.

Kelishmovchilik ikki guruh yigitlari orasida kelib chiqqan. 8 kishidan iborat boʻlgan birinchi guruh orasida ikki nafar qiz ham boʻlgan va ularning hammasi Amir Temur koʻchasida joylashgan tungi klub yonida boʻlgan. 5 kishilik ikkinchi guruh ham oʻsha atrofda boʻlgan.

“Qizlardan birining oʻz guruhidagi yigitga aytgan gapi boshqa guruhdagi yigitga xuddi unga aytilgandek tuyulgan. Shu sababli orada kelib chiqqan mojaro mushtlashuvga aylanib ketgan”, – deyiladi xabarda.

Aniqlik kiritilishicha, mushtlashuv davomida ikkinchi guruh ishtirokchisi 23 yoshli S.X. pichoq chiqarib, tartibsiz ravishda zarba berishni boshlagan. Oqibatda toʻrt nafar yigit jabrlanib, ulardan ikki nafari vafot etgan.

Voqea joyiga yetib kelgan Toshkent shahar IIBB xodimlari 23 yoshli S.X., 18 yoshli S.K., 23 yoshli R.X. va yana bir necha kishi qoʻlga olib, ichki ishlar boʻlimiga olib ketgan. Oʻzbekiston Jinoyat kodeksining 97-moddasi 2-qismi (qasddan odam oʻldirish) boʻyicha jinoyat ish qoʻzgʻatildi. Gumonlanuvchi tariqasida jinoiy ishga jalb qilingan S.X. qoʻlga olingan.

Ayni vaqtda kelishmovchilikning yana ikki nafar ishtirokchisi S.K. va R.X.ga nisbatan Jinoyat kodeksining 277-moddasi 2-qismi (bezorilik) boʻyicha jinoiy ish qoʻzgʻatildi. Mazkur shaxslar ham qoʻlga olingan.

“Kelishmovchilikning boshqa ishtirokchilarini qoʻlga olish boʻyicha choralar koʻrilmoqda”, – deyiladi IIBB axborotida.

Eslatib oʻtamiz, avvalroq Yunusobod tumanida fuqaro tungi klub oldida 4 kishini pichoqlagani, pichoqlanganlarni ikki nafar vafot etgani xabar qilingan edi.

Asosiy mavzular