TOShKENT, 15 okt — Sputnik. Surxondaryo viloyati Termiz shahrida o‘z farzandini sotayotgan ota jinoyat ustida qo‘lga olindi. Bu haqda IIV huzuridagi Tergov departamenti xabar qilmoqda.
2020 yilning 6-oktabr kuni soat 15:00 da tezkor tadbir o‘tkazilgan. Unda Denov tumani “Shahrinav” mahallasida yashovchi 28 yoshli S.Z. shartli mijozga voyaga yetmagan farzandi 2 yoshli M.S.ni 2 500 dollar va 24 250 000 so‘m evaziga sotayotgan vaqtida ushlangan. Ular bolani Termiz shahridagi restoranlarning birida savdolashgan.
Tadbir jarayonida S.Z.dan kimoviy ishlov berilgan pullar, voyaga yetmagan M.S.ning tug‘ilganlik haqidagi guvohnomasi va uning farzandini o‘z xohishi bilan sotganligi to‘g‘risidagi tilxati rasmiylashtirib olingan.
Mazkur holat yuzasidan O‘zbekiston JKning 135-moddasi 3-qismi “a” bandi (Odam savdosi, o‘n sakkiz yoshga to‘lmaganligi aybdorga ayon bo‘lgan shaxsga nisbatan sodir etilgan bo‘lsa) bilan jinoyat ishi qo‘zg‘atilgan.
S.Z. protsessual tartibda ushlangan va unga ayblov e’lon qilingan.
Unga qamoqqa olish tarzidagi ehtiyot chorasi qo‘llanilgan. Hozirda tergov harakatlari olib borilmoqda.
