TOShKENT, 28 okt — Sputnik. Jizzax viloyatining Zarbdor tumanida “Jiguli” va eshak arava ishtirokida sodir bo‘lgan yo‘l-transport hodisasi oqibatida ikki kishi halok bo‘ldi. Bu haqda IIV YHXBB axborot xizmati xabar berdi.
YTH 27-oktabr kuni soat 19:50 larda Yangiyer—Dashtobod avtomobil yo‘lining 35 kilometrida sodir bo‘lgan. 1999-yilda tug‘ilgan fuqaro “VAZ-2106” avtomobilini katta tezlikda boshqarib borayotib, yo‘lning o‘ng tomonidan harakatlanib kelayotgan eshak aravaning orqa tomoniga urilgan.
Natijada eshak aravada bo‘lgan 1958-yilda tug‘ilgan X.E. hamda 1998-yilda tug‘ilgan A.P. turli darajadagi tan jarohatlarini olib, Zomin tuman tibbiyot birlashmasiga yotqizilgan. Ko‘rsatilgan tibbiy muolajalarga qaramasdan jabrlanuvchilar vafot etgan.
Hozirda mazkur holat yuzasidan tergov harakatlari olib borilmoqda.
