TOShKENT, 8 noya — Sputnik. O‘zbekiston bosh prokurori Nig‘matilla Yo‘ldoshev so‘nggi ikki yil ichida respublikada huquqni muhofaza qilish idoralarining 318 xodimi jinoiy javobgarlikka tortilganini ma’lum qildi.
Ta’kidlanishicha, “Ark buloq” bojxona posti boshlig‘i J. boshchiligidagi bir guruh bojxona xodimlari pora evaziga turli subyektlar tomonidan import qilingan tovarlar qiymatini pasaytirib ko‘rsatib, davlat manfaatlariga qariyb 9 milliard so‘m zarar yetkazgan.
Tergov jarayonida J.ning uyida o‘tkazilgan tintuvda pora sifatida olingan 311 ming dollar naqd pullar topilgan.
Bundan tashqari, jinoiy yo‘l bilan topilgan pullar evaziga Bo‘stonliq tumanida 8 sotixli dala hovli qurganligi, “Tashkent City” majmuasidan 2 ta xonadon va 1 ta noturar joy hamda “Captiva” avtomashinasini sotib olganligi aniqlangan.
Bosh prokuror hozirda J. va uning sheriklari sud oldida javob berayotganini qo‘shimcha qildi.
