11:36 16 Yanvar 2021
Efir
  • RUB141.29
  • EUR12796.16
  • USD10473.20
Hodisalar
Havola olish
322 0 0

Aniqlanishicha, videotasvirda keltirilgan ona A.R. va uning farzandlari Toshkent viloyati Bekobod tumani “Turkman” MFY da doimiy yashab keladi.

TOSHKENT, 17 dek — Sputnik. Sirdaryo viloyati Shirin shahar hokimligi ona oʻz farzandlarini daryoga tashlamoqchi boʻlgani aytilgan video yuzasidan maʼlumot berdi.

Voqea Sirdaryo viloyati Shirin shahar Ichki ishlar boʻlimi hamda “Farhod” mahalla fuqarolar yigʻini xodimlari tomonidan oʻrganilganda quyidagilar aniqlangan: videotasvirda keltirilgan ona A.R. va uning farzandlari Toshkent viloyati Bekobod tumani “Turkman” MFY da doimiy yashab keladi. Videodagi holat 2020 yil 15 dekabr kuni sodir boʻlgan.

Oʻrganishlar natijasida ona oʻz turmush oʻrtogʻi E.SH.dan boshqa bir ayol bilan baʼzi-baʼzida telefon orqali soʻzlashayotganligini bilib, uni rashk qilgani aniqlangan. Keyin achchiq ustida Toshkent viloyati Bekobod tumanidan Sirdaryo viloyati Shirin shahar “Farhod” MFYga oʻtadigan “Doʻstlik” kanali koʻprigining Bekobod tumani qismidan oʻz farzandlarini kanalga tashlamoqchi boʻlgan.

Shunda uni Shirin shahar Ekologiya va atrofni muhofaza qilish boʻlimi xodimlari toʻxtatib qolgan.

Shirin shahar IIB hamda “Farhod” MFY xodimlarining surishtiruvlari natijasida aniqlanishicha, 1985 yilda Toshkent viloyati Bekobod tumanida tugʻilgan ayol (ona) A.R va uning turmush oʻrtogʻi E.SH.lar oʻrtasida rashk tufayli hech qanday oilaviy mojarolar va janjallar boʻlmagan.

Boʻlib oʻtgan mazkur voqea Toshkent viloyati Bekobod tumani hududida boʻlganligi hamda voqea ishtirokchilari ham Bekobod tumanida doimiy yashab kelayotganligi sababli bugungi kunda ushbu holat yuzasidan Toshkent viloyati Bekobod tumani IIB hamda “Turkman” MFY xodimlari tomonidan surishtiruv ishlari olib borilmoqda.

“Mazkur voqea Toshkent viloyati Bekobod tumani hududida va ushbu tuman fuqarolari ishtirokida boʻlganligini inobatga olgan holda, ijtimoiy tarmoqlarda bu voqea "Sirdaryo viloyati Shirin shahrida boʻlgan" deya tarqatilgan notoʻgʻri xabarlar yuzasidan ijtimoiy tarmoqlardagi faol blogerlar hamda kuzatuvchilardan tasdiqlanmagan, notoʻgʻri axborot tarqatmaslikni va bu boʻyicha qonunchilikda belgilangan tartibda javobgarlik mavjud ekanligini eslatib oʻtmoqchimiz”, - deyilgan hokimlik xabarida.

Teglar:
Toshkent viloyati, Sirdaryo viloyati

Asosiy mavzular