11:51 26 Fevral 2021
Efir
  • RUB141.09
  • EUR12773.52
  • USD10549.65
Hodisalar
Havola olish
402 0 0

Toshkentda tadbirkorni qoʻllari va oyoqlarini tanasidan ajratib, boʻlaklarga boʻlib chuqurga koʻmib yuborgan qotil va uning jinoiy sheriklari uzoq muddatga qamaldi. Sheriklardan biri “Zulfiya” mukofoti sohibasi.

TOSHKENT, 16 fev — Sputnik. Jinoyat ishlari boʻyicha Toshkent shahar sudi 31 yoshli tadbirkorni oʻldirib, uning jasadini boʻlaklarga ajratib, koʻmib yuborgan shaxs va uning jinoiy sheriklariga sud hukm oʻqildi. “Oʻzbekiston” teleradiokanalining “Bir jinoyat izidan” koʻrsatuvida mudhish jinoyat tafsilotlari maʼlum qilindi.

Aniqlanishicha, 2020 yilning 8 may kuni Uchtepa tuman IIBga fuqaro Nigora Payzibekova murojaat qilib, 1989 yilda tugʻilgan oʻgʻli Ravshan Rahmatullayev 7 may kuni soat 10:00 da oʻz ishlari bilan “Lacetti”mashinasida uydan chiqib ketgani va shundan keyin qaytib kelmaganini bildirgan.

Ravshan Yunusobod tumanida yashovchi, 1990 yilda tugʻilgan Jamoliddin Orifboyev bilan tanish boʻlgan. Jamoliddin 2020 yil yanvar oyida Ravshandan keyinchalik sotib olish sharti bilan “Spark”ni ijaraga olgan. Biroq Jamoliddin pullarni oʻz vaqtida toʻlamagani sababli Ravshan u bilan ogʻzaki tortishib qolgan va achchiq ustida avtomobilni qaytarib olgan. Ravshan boshlangʻich toʻlov sifatida berilgan 2000 dollarning 1000 dollarini mashinasi yukxonasidan olib bergan. Jamoliddin mashina yukxonasida katta miqdorda pul borligini koʻrib qolgan.

Ilgari oʻgʻrilik va bosqinchilik jinoyatlari uchun sudlangan Jamoliddin Ravshanning pullarini bosqinchilik yoʻli bilan qoʻlga kiritishga ahd qilgan. Bunga Mirmaqsud Mahkamov va Sevara Abdulhakimovani ham jalb qilgan.

Jamoliddin telegram orqali oʻzini ayol kishi sifatida tanishtirib, Ravshan bilan muloqotga kirishgan. Ravshan tanishgan “Imona” ismli qiz bilan 2020 yilning 7 may kuni uchrashishga kelishgan. Oʻz vaqtida karate boʻyicha jahon chempioni boʻlgan Sevara Abdulhakimova uchrashuvga chiqib, oʻzini Imonaning singlisi sifatida tanishtirib, opasining oldiga olib borishini aytadi va Ravshanni Jamoliddinning Yunusoboddagi uyiga olib borgan.

Uni uyda taxta bilan qurollangan, yuziga niqob taqib olgan Jamoliddin va Mirmaqsud poylab turadi. Kelishi bilan Ravshanni urib-tepib, uni stulga bogʻlab qoʻyadi. Bosqinchilar jabrlanuvchining yonidan 400 dollar va 1 million soʻm pulini olishadi. Undan yana pul talab qilishadi. Shunda Ravshan telegram orqali ota-onasiga xabar yuborib, mashina olish uchun 29 ming dollar kerakligini, uni biznes hamkori Muzaffar Sagatov orqali berib yuborishlarini soʻraydi.

Jinoyatchilarning tahdidi ostida bu gaplarni otasiga telefon qilganda ham takrorlaydi. Muzaffar Sagatov Ravshanning telefonda bergan koʻrsatmasi asosida Yunusobod tumani Markaz-5 mavzesida oʻzini “Aziz” deb tanishtirgan Jamoliddin bilan koʻrishib, unga 29 ming dollarni berib yuborgan.

Jamoliddin oyoq-qoʻllari bogʻlangan Ravshanni mashina yukxonasiga joylashtirib, Yashnobod tumanida ijaraga olgan xonadoniga olib borgan. Bu yerda ham Ravshandan yana pul talab qila boshlagan. Ravshandan rad javobini olgach, uning yuz va bosh qismiga urib, boʻynidan boʻgʻib qasddan oʻldirgan. Jamoliddin jinoyatini yashirish maqsadida Qoʻyliq dehqon bozoridan yollanma ishchilar olib kelib, hojatxona uchun deb chuqur qazdirgan. Soʻngra Ravshanning boshi, qoʻllari va oyoqlarini tanasidan ajratib, boʻlaklarga boʻlib chuqurga koʻmib yuborgan.

Jinoyat ishlari boʻyicha Toshkent shahar sudining hukmiga koʻra, Jamoliddin Orifboyev Jinoyat kodeksining 97-moddasi 2-qismining “v”, “i” bandlari (aybdorga ayon boʻlgan ojiz ahvoldagi shaxsni; tamagirlik niyatida qasddan oʻldirish), 134-moddasi (qabrni tahqirlash), 164-moddasi 4-qismining “a” bandi (juda koʻp miqdorda bosqinchilik), 169-moddasi 3-qismi “a” (takroran yoki xavfli retsidivist tomonidan sodir etilgan oʻgʻrilik) bandlarida nazarda tutilgan jinoyatlarni sodir etganlikda aybdor deb topilgan. Unga uzil-kesil 25 yil muddatga ozodlikdan mahrum qilish jazosi tayinlangan.

Mirmaqsud Mahkamov Jinoyat kodeksining 164-modda 4-qismi “a” bandida nazarda tutilgan jinoyatni sodir etganlikda aybdor deb topilgan.  Endi 15 yilni panjara ortida oʻtkazadi.

Sevara Abdulhakimova Jinoyat kodeksining 164-modda 4-qismi “a” bandida nazarda tutilgan jinoyatni sodir etganlikda aybdor deb topilgan. Unga nisbatan Jinoyat kodeksining 57-moddasi (yengilroq jazo tayinlash) qoʻllanilib, 13 yil qamoq jazosi tayinlangan. U 2014 yilda Zulfiya nomidagi davlat mukofoti bilan taqdirlangan.

Teglar:
qotillik, jinoyat, Toshkent

Asosiy mavzular