TOShKENT, 9 yanv — Sputnik. Toshkent yuridik kolleji sobiq direktori qonun oldida javob beradi. Bu haqda O‘zA muxbiriga O‘zbekiston Respublikasi Bosh prokuraturasi jamoatchilik bilan aloqalar va huquqiy axborot bo‘limi boshlig‘i Gulnoza Rahimova ma’lum qilgan.
Eslatib o‘tamiz, Toshkent yuridik kolleji o‘quvchilari dars vaqtida kollej hovlisida o‘zaro janjallashib, pichoqbozlik qilishi oqibatida ularning biri vafot etgani, biri esa og‘ir tan jarohati olgani ko‘pchilikning qalbini larzaga solgan edi.
"Haqiqatan ham sodir bo‘lgan mudhish voqeadan keyin Toshkent shahar prokuraturasi tomonidan mazkur kollejda tekshirish o‘tkazildi. Natijada bu o‘quv maskanida boshqa jinoyatlar sodir bo‘layotgani ham aniqlandi va jinoyat ishi qo‘zg‘atildi.
Surishtiruv davomida kollej sobiq direktori Natalya Temirova va boshqalar davlat budjeti mablag‘larini yirik miqdorda talon-taroj qilish, yuridik kollejga noqonuniy yo‘l bilan o‘qishga kirgan talabalarga diplomlar berish kabi holatlarga yo‘l qo‘ygani ma’lum bo‘ldi", — deb ta’kidlagan Rahimova.
Mazkur jinoyat ishiga aloqador bo‘lgan hamda O‘zbekiston Respublikasi Jinoyat kodeksining tegishli moddalari bilan ayblanayotgan N.Temirovaga nisbatan 2017-yil 25-noyabr kuni qamoqqa olish ehtiyot chorasi qo‘llanilgan.
Jinoyat ishi bo‘yicha tergov harakatlari davom etmoqda.