TOShKENT, 31-iyul - Sputnik. O‘zbekistonda koronavirus infeksiyasi qayd etilganlar soni 287 nafarga ortdi va hozirda 23 558 kishini tashkil etmoqda, deb xabar beradi Sog‘liqni saqlash vazirligi jamoatchilik bilan aloqalar bo‘limi.
Yangi kasallanish holatlarining 111 nafari Karantin markazidagi xorijdan kelgan fuqarolar orasida, 112 nafari Toshkent, 22 nafari Sirdaryo, 17 nafari Qashqadaryo, 15 nafari Namangan hamda 10 nafari Navoiy viloyatlarida aniqlangan.
Mamlakatda 9 741 nafar bemorga standartlar bo‘yicha davo choralari ko‘rilmoqda. Ulardan 436 nafari og‘ir, 181 nafari esa o‘ta og‘ir ahvolda. 137 inson virus qurboniga aylangan.
Butunjahon sog‘liqni saqlash tashkiloti taqdim etgan so‘nggi ma’lumotlarga ko‘ra, dunyoda koronavirus bilan bemorlanish holatlari 16,8 milliondan oshib ketgan, 662 ming kishi infeksiya tufayli vafot etgan.
So‘nggi bir sutkada COVID-19ga chalinganlik bo‘yicha 253 793 ta yangi holat qayd etilgan, 5 999 kishi qurbon bo‘lgan.
BSST 11-mart kuni yangi turdagi COVID-19 koronavirus infeksiyasi tarqalishini pandemiya deb e’lon qilgan edi.
