O‘zbek militsiyasi Yaponiya, Malayziya va Xitoy politsiyachilaridan tajriba o‘rganadi

TOShKENT, 19 apr — Sputnik. Yaponiyaning O‘zbekistondagi Favqulodda va Muxtor Elchisi Nobuaki Ito O‘zbekiston Ichki ishlar vazirligiga tashrif buyurdi, deb xabar qildi O‘zbekiston IIV matbuot-xizmati.

O‘zbekiston IIV rahbari Abdusalom Azizov elchi Nobuaki Itoga murojaat qilar ekan "Yaponiya O‘zbekistondan olisda joylashgan bo‘lsa-da, ammo biz har doim Yaponiya hukumati va xalqi e’tibori hamda qo‘llab-quvvatlashini his qilib turamiz", degan. Shuningdek, kunchiqar mamlakat birinchilardan bo‘lib O‘zbekiston suverenitetini tan olganligi, mamlakatni rivojlantiruvchi muhim sohalarda har tomonlama yordam berib kelgani ham ko‘p narsadan dalolat berishini qayd etgan.

O‘zbekiston va Yaponiya singari do‘stona davlatlar o‘rtasida davlatlar va idoralararo samarali va yaqin hamkorlik yo‘lga qo‘yilgani ta’kidlangan.

Jumladan, O‘zbekiston va Yaponiya Ichki ishlar mahkamalari o‘rtasida xavfsizlik masalalarida va xalqaro terrorizm hamda jinoyatchilikning boshqa turlariga qarshi kurash bo‘yicha hamkorlik yo‘lga qo‘yilgani aytib o‘tilgan. O‘zbekiston IIV xodimlari delegatsiyalar tarkibida yaponiyalik hamkasblari bilan bir necha bor uchrashganliklari va professional sohada o‘zlari uchun ko‘plab yangi va foydali ko‘nikmalar olganliklari ta’kidlangan.

"Muhataram Prezidentimiz Shavkat Miromonovich jamoatchilik xavfsizligini ta’minlash borasida Yaponiya, Malayziya va Xitoy huquq-tartibotchilari tajribasini o‘rganishni va o‘zlashtirishni taklif etdilar. Va bu o‘zaro manfaatli hamkorlik jihatdan ham juda foydali bo‘lardi. Yaponiyada, xuddi O‘zbekistonda singari, milliy urf-odatlar va an’analarga sadoqat, katta avlodga hurmat-ehtirom, yoshlarning Vatanga muhabbat ruhida tarbiya qilinishiga katta e’tibor ko‘rsatiladi. Mana shu umumiy mohiyat bizning xalqlarimizga yanada yaqinroq bo‘lish va o‘zaro aloqa qilish imkonini beradi", — degan vazir, general-mayor Azizov.

Yaponiya Elchisi suhbat davomida diplomatik korpuslarni qo‘riqlayotgan O‘zbekiston Ichki ishlar xodimlarining professionalligi va o‘z burchiga sadoqati eng yuqori maqtovlarga loyiqligini e’tirof etgan. Shuningdek, Elchi O‘zbekistonga har yili dunyoning turli burchaklaridan juda ko‘plab sayyohlar tashrif buyurishlarini, ular orasida boshqa mamlakatlar qatorida, Yaponiya fuqarolari ham borligini va ular O‘zbekiston hududida to‘liq xavfsizlikda ekanini qayd etgan. Elchining so‘zlariga ko‘ra, bu — O‘zbekiston huquqni muhofaza qilish organlarining jinoyatchilikni turli shakllariga qarshi kurashishda qobiliyati tasdig‘i bo‘lib, aynan shuning uchun mamlakatda tinchlik va osoyishtalik ishonchli saqlanib kelinmoqda.