TOShKENT, 5 dek — Sputnik, Dilshoda Rahmatova. Toshkentdagi "Ko‘ksaroy" qarorgohida bo‘lib o‘tgan muzokaralar yakuni bo‘yicha O‘zbekiston va Afg‘oniston prezidentlarining qo‘shma bayonotlari o‘ta samimiy ruhda kechdi. Ashraf G‘ani va Shavkat Mirziyoyev tadbir davomida bir-birlariga bir necha marotaba "birodarim" deya murojaat qildilar.
O‘zbekiston prezidenti o‘z navbatida Ashraf G‘aniga, uning yuzida butun afg‘on xalqiga yuksak hurmatini namoyish etdi va Afg‘oniston rahbarini "katta birodarim", deya e’zozladi.
"Katta birodarim bilan katta rejalar qildik. Ikki prezident-birodarlar ko‘p narsalarga qodirligimizni amalda ko‘rsatamiz", — dedi O‘zbekiston rahbari.
Eslatib o‘tamiz, 5-dekabr kuni O‘zbekiston va Afg‘oniston o‘rtasida siyosiy, savdo-iqtisodiy, investitsiyaviy, transport-kommunikatsiya, fan, ta’lim va boshqa sohalarda hamkorlikni yanada mustahkamlashga qaratilgan 20 hujjat imzolandi.
Mirziyoyev Afg‘oniston bilan bog‘liq kelgusi rejalar haqida gapirar ekan, "birinchi galdagi vazifamiz Afg‘onistonning mintaqaviy iqtisodiy-ijtimoiy jarayonlarga qo‘shilishi uchun har tomonlama ko‘maklashishdan iborat", dedi.
O‘zbekiston prezidenti bu jahon hamjamiyatining Afg‘onistonda tinch taraqqiyotni ta’minlashga qaratilgan sa’y-harakatlariga uyg‘un va hamohang ekanligini alohida qayd etdi.
Mirziyoyev O‘zbekiston bundan buyon ham qo‘shni Afg‘onistonni iqtisodiy jihatdan tiklash, uning transport va energetik infratuzilmasini rivojlantirish, milliy kadrlarini tayyorlash jarayonlarida faol ishtirok etishini ma’lum qildi.
