TOShKENT, 17 apr – Sputnik. Joriy yilning 11-17-aprel kunlari Samarqand shahrida O‘zbekiston-Tojikiston davlat chegarasi demarkatsiyasining tashkiliy-huquqiy masalalarini kelishish yuzasidan O‘zbekiston va Tojikiston delegatsiyalarining navbatdagi uchrashuvi bo‘lib o‘tdi. Bu haqda TIV matbuot xizmati xabar qildi.
Qayd etilishicha, muzokaralar chog‘ida O‘zbekiston-Tojikiston davlat chegarasi demarkatsiyasi bo‘yicha normativ-texnik hujjatlar loyihalari tayyorlangan hamda dala ishlari reja-grafigi kelishilgan.
“Tadbir yakunlariga ko‘ra Protokol imzolandi. Ikki mamlakat delegatsiyalarining navbatdagi majlisi may oyining ikkinchi o‘n kunligida Tojikiston hududida bo‘lib o‘tadi”, - deyiladi xabarda.
Vazirlik xabarida uchrashuv do‘stlik va hamjihatlik ruhida o‘tgani ta’kidlangan.
O‘zbekiston va Tojikiston davlat chegarasi uzunligi 1,330 kilometrdan ortiq. Bugungi kun holatida ushbu chegara chizig‘ining 20% demarkatsiya qilinmagan holda qolmoqda.
