22:12 20 Oktyabr 2020
Efir
  • RUB133.19
  • EUR12153.63
  • USD10371.76
Siyosat
Havola olish
123 0 0

Oʻzbekiston va Tojikiston prezidentlari boʻlajak sammitning yangi kun tartibini har tomonlama puxta tayyorlash boʻyicha “yoʻl xarita”sini ishlab chiqishga topshiriq berdilar.

TOSHKENT, 5 okt — Sputnik. Oʻzbekiston prezidenti Shavkat Mirziyoyev 5 oktyabr kuni Tojikiston prezidenti Emomali Rahmon bilan telefon orqali muloqot qildi.

“Suhbat avvalida davlatimiz rahbari Tojikiston Prezidentini tavallud ayyomi bilan samimiy tabriklab, unga mustahkam sogʻlik, farovonlik va yangi muvaffaqiyatlar tiladi”, - deyilgan prezident matbuot xizmati xabarida.

Prezidentlar ikki mamlakat oʻrtasidagi koʻp asrlik doʻstlik va yaxshi qoʻshnichilik rishtalari, tarix, madaniyat va anʼanalar mushtarakligiga asoslangan strategik sheriklik munosabatlarining bugungi darajasini katta mamnuniyat bilan qayd etdilar.

Taʼkidlanishicha, koronavirus tarqalishi bilan bogʻliq murakkab davrda pandemiya oqibatlarini yengib oʻtishda oʻzaro yordam koʻrsatilmoqda. Tojikiston tomoni ushbu xavfli kasallikka qarshi kurashda koʻrsatilgan amaliy yordam uchun minnatdorlik bildirdi. 

Davlat rahbarlari oʻtgan oyda boʻlib oʻtgan qator ikki tomonlama tadbirlarning samarali natijalarini yuqori baholadilar. Xususan, Hukumatlararo komissiyaning navbatdagi majlisi hamda biznes-forum, ilmiy-amaliy konferentsiya, parlament aʼzolari va ziyolilar uchrashuvlari muvaffaqiyatli oʻtkazildi, qoʻshma ishlab chiqarish quvvatlari va ijtimoiy obʼyektlar ochildi.

Oʻzbekiston va Tojikiston prezidentlari ikki mamlakat hukumatlariga keng koʻlamli hamkorlikni kengaytirish hamda boʻlajak sammitning yangi kun tartibini har tomonlama puxta tayyorlash boʻyicha “yoʻl xarita”sini ishlab chiqishga topshiriq berdilar.

Xalqaro siyosat va mintaqaviy hamkorlikning dolzarb masalalari yuzasidan ham fikr almashildi.

Telefon muloqoti soʻngida Mirziyoyev Tojikiston prezidentiga mamlakat siyosiy hayotidagi muhim tadbir – joriy yil 11 oktyabr kuni boʻlib oʻtadigan prezident saylovi muvaffaqiyatli oʻtishini tiladi.

Asosiy mavzular