01:26 25 Noyabr 2020
Efir
  • RUB136.69
  • EUR12344.73
  • USD10414.86
Jamiyat
Havola olish
45118508

Hozirda arzon uylarning dastlabki loyihalari va qurilish joylari aniqlanmoqda

TOSHKENT, 6 dek — Sputnik. Samarqand viloyati tumanlarida 1 758 ta yangilangan loyihadagi namunaviy uylar quriladi, deb xabar qilmoqda "Zarafshon" nashri.

Nashrga koʻra, Oʻzbekiston Respublikasi Prezidentining 2016 yil 21 oktyabrdagi "2017-2021 yillarda qishloq joylarda yangilangan namunaviy loyihalar boʻyicha arzon uy-joylar qurish dasturi toʻgʻrisida"gi qaroriga asosan mazkur yoʻnalishdagi ishlar keng koʻlamda davom ettirilib, qishloq aholisining turmush sharoitini yanada yaxshilashga eʼtibor qaratilmoqda.

"Prezident qarori asosida 2017 yil dasturida qishloq joylarida namunaviy loyihalarni takomillashgan, energotejamkor, optimal yechimlarga ega, kamqiymatli, uyga muhtoj oilalarga moʻljallangan arzon narxlarda yakka tartibdagi uy-joylar namunalarining uchta turini qurish nazarda tutilgan", — deb taʼkidlagan nashrga bergan intervyusida "Qishloq qurilish invest" injiniring kompaniyasi viloyat filiali direktori Akmal Shukurov.

Shukurovning soʻzlariga koʻra, birinchi turi boʻyicha uch yoki toʻrt yoʻlakli alohida oshxona, yuvinish xonasi va qoʻshimcha binolari boʻlgan umumiy maydoni 42,4 metr kvadratdan iborat 2 xonali hamda 52,4 metr kvadratni tashkil etuvchi 3 xonali uylar qurish rejalashtirilgan. Ikkinchi turi boʻyicha aholi zich joylashgan massivlarda 2 sotix maydondagi yer uchastkasida bir qavatli ikki va uch xonali arzon uylar quriladi. Hovli qismida bolalar oʻyingohi, uy egalari dam olishlari uchun sharoitlar eʼtiborga olingan.

Taʼkidlanishicha, kanalizatsiya tizimi alohida chiqindixonaga ulanadi. Suv taʼminoti qiyin boʻlgan hududlarda esa har bir xonadonga alohida qoʻshimcha zaruriy binolar qurilishi mumkin. Suv taʼminoti yaxshi boʻlgan va markazlashgan kanalizatsiya tizimi mavjud hududlarga 3 qavatli 24 xonadonli uy-joylar qurilishi ham nazarda tutilgan.

Uchinchi turi boʻyicha esa har biriga alohida 4 sotix maydonga ega 2 qavatli qoʻshib qurilgan 4 xonali 2 xonadonga moʻljallangan uylar quriladi. Bunda birinchi qavatda zal, oshxona, yuvinish xonasi, ayvon, qozonxona va boshqa xonalar rejalashtirilgan. Ikkinchi qavatda ota-ona va bolalar uchun 3 ta yotoqxona, yuvinish xonasi va yoʻlak loyihalashtirilgan. Hovli qismida qurilayotgan namunaviy uylardagi kabi darvozaxona, kirish eshigi, omborxona va boshqa qoʻshimcha binolar boʻladi. Bundan tashqari, hovlisida bolalar oʻynashi, xonadon sohiblarining dam olishi, daraxt, ekin va gullar parvarishlashi uchun 81 kvadrat metr joy qoladi.

2 sotix maydonda uy-joylar quriladigan massivlarda eni 13 metrli ichki koʻchalar, uy-joylar oraliq qismida xoʻjalik maqsadlari uchun 4 metrli yoʻlaklar quriladi.

2009 yilda qabul qilingan qishloq joylarda namunaviy loyihalar boʻyicha yakka tartibdagi uy-joylar qurish dasturi doirasida uy quruvchining dastlabki badali 25 %ni tashkil etgan boʻlsa, yangi dastur boʻyicha birinchi va ikkinchi turdagi uylar uchun 15% miqdorida dastlabki toʻlov amalga oshiriladi.

Qaror asosida bunday uylarning qurilishi aholiga juda katta qulaylik yaratadi. Dastlabki hisoblarga koʻra, birinchi turdagi 2 qavatli 4 yoʻlakli 16 xonadonli uy-joylarning 2 xonasi narxi 85 million soʻm, 3 xonali esa 100,7 million soʻmni, ikkinchi turdagi aholi zich joylashgan tumanlarda 2 sotix maydondagi yer uchastkasida barpo etiladigan bir qavatli 2 xonali uylar 101,5 million soʻmni, bir qavatli 3 xonali uylar 118,7 million soʻmni, uchinchi turdagi 4 sotix maydondagi yer uchastkasida barpo etiladigan 4 xonali uylar esa 181,8 million soʻmni tashkil etmoqda.

Bunda birinchi va ikkinchi turdagi uy-joylarga 15 %lik boshlangʻich toʻlov belgilangan boʻlib, qolgan qismi 7 foizlik imtiyozli davr bilan 15 yilga uy egasi nomiga kredit ajratiladi.

Uchinchi turdagi 4 sotixli 4 xonali uylarning narxi 181,8 million soʻmni tashkil etib, birinchi toʻlov sifatida uy narxining 25 % miqdorida badal puli toʻlanadi. Yaʼni, xonadon sohibi 45,5 million soʻm atrofida birinchi toʻlovni toʻlashi lozim boʻladi. Qolgan qismi uchun 15 yilga 7 %lik imtiyozli kredit ajratiladi.

Uy-joylarga elektr, gaz, ichimlik suv tarmoqlari tortish va ichki yoʻllarni qurish respublika byudjeti hisobidan bajariladi.

"Oʻtgan yillarda namunaviy loyihadagi uylarning moliyaviy tomonlari bilan asosan "Qishloq qurilish bank" TIF Milliy banki, "Ipotekabank" shugʻullangan boʻlsa, yangi qaror asosida Xalq banki, "Asakabank" va "Oʻzsanoatqurilishbank" kabi moliya muassasalari ham jalb etildi", — deb maʼlum qilgan suhbatdosh.

Nashr xabariga koʻra, Samarqand viloyati tumanlarida barcha turdagi uylardan 1 758 ta yangilangan loyihadagi namunaviy uylar quriladi. Shu jumladan, Past Dargʻom tumanida 182 ta, Paxtachida 52 ta, Jomboyda 102 ta, Narpay tumanida 72 ta, Ishtixonda 102 ta, Bulungʻurda 57 ta, Kattaqoʻrgʻon tumanida 77 ta, Nurobod, Qoʻshrabot va Payariqda 42 tadan, Tayloqda 152 ta, Oqdaryoda 372 ta, Samarqand tumanida 319 ta, Urgutda 145 ta uylar qurilishi rejalashtirilgan.

Xabarda aytilishicha hozirda bunday uylarning dastlabki loyihalari va qurilish joylari aniqlanmoqda.

Teglar:
Jomboy, soʻm, million, kottedjlar, arzon uylar, Samarqand, Oʻzbekiston

Asosiy mavzular