01:37 25 Noyabr 2020
Efir
  • RUB136.69
  • EUR12344.73
  • USD10414.86
Jamiyat
Havola olish
54140

Dekabr oyi deyarli tugab bormoqda. Havo sovib, qor-yomgʻir boshlanganiga ham ancha boʻldi. Bunday ob-havo sharoitida oʻquvchilarning oʻqish samaradorligi taʼlim muassasasining issiqlik bilan qay darajada taʼminlanganiga bogʻliq...

TOSHKENT, 20 dek — Sputnik, Dilshoda Rahmatova. Sputnik Oʻzbekiston muxbiri bergan maʼlumotlarga koʻra, Samarqand viloyati Bulungʻur tumani 23-oʻrta taʼlim maktabida issiqlik taʼminoti masalasi oʻta chatoq. Boshlangʻich sinf oʻquvchilari sinfxonalarning sovuqligi tufayli maktabga bormay qoʻygan.

"Sinfxonalar juda sovuqligi uchun qoʻshnilarimiz oʻz farzandlarini maktabga yubormay qoʻydi. Chunki sovuq sinfxonalar oqibatida oʻquvchilarning aksariyati kasal boʻlib qolmoqda", — deb taʼkidladi muxbir.

Maktabdagi ahvol yuzasidan izoh olish maqsadida maktabdagi issiqlik taʼminoti uchun masʼul mutasaddi rahbarlarni izlashga kirishdik.

Oʻzbekiston Respublikasi Xalq taʼlimi vazirligi matbuot-xizmati vakiliga ushbu savol bilan murojaat qilganimizda, u bu masala boʻyicha mahalliy hokimiyatga murojaat etishimizni tavsiya qildi. "Maktablarning qishki mavsumga tayyorgarlik jarayonini hokimiyat nazorat qiladi", — deya qoʻshimcha qildi u.

Shundan soʻng, Samarqand viloyat Xalq taʼlimi boshqarmasi va undan soʻng Bulungʻur tumani Xalq taʼlimi boʻlimi mudiri bilan bogʻlandik.

Sputnik Oʻzbekiston nashrining ushbu murojaatidan keyin Bulungʻur tumani Xalq taʼlimi boʻlimi mudiri 23-maktabda boʻlib, sinfxonalarda issiqlik taʼminoti qay darajada ekanini shaxsan koʻzdan kechirgan.

"Sinfxonalar issiqligi normal holatda. Parovoy ishlayapti. Sinfxonalarga kechgacha alohida pechka qoʻshishga topshiriq berdim. Qoʻshimcha choralar koʻriladi", — deya taʼkidladi Sputnik Oʻzbekiston muxbiriga Bulungʻur tumani xalq taʼlimi boʻlimi mudiri.

Eslatib oʻtmoqchimiz, 15 dekabr kuni Xalq deputatlari Toshkent viloyati kengashining navbatdagi sessiyasida Oʻzbekiston prezidenti Shavkat Mirziyoyev kollej oʻquvchilarining davomati nazoratsiz qolayotganini, mutasaddilar bu masalaga alohida eʼtibor qaratishlari zarurligini taʼkidlab oʻtgan edilar. Fikrimizcha, nafaqat kollej oʻquvchilari, balki maktab oʻquvchilari davomati ham qattiq nazoratga olinishi kerak.

Qolaversa, oʻqish samaradorligi koʻp jihatdan taʼlim muassasalarining issiqlik bilan qay darajada taʼminlanganiga bogʻliqligini unutmaslik muhim.

Maktablardagi qish mavsumiga tayyorgarlik holati darajasi mutasaddi rahbarlar tomonidan kelib tushgan shikoyatlardan keyin emas, balki muntazam tekshirib borilishi tarafdorimiz.

Zero, qishning ayozli kunlarida sinf xonalarda moʻʼtadil haroratni yaratish bilan birga darslarning toʻliq oʻtilishiga erishish, va eng muhimi, bolalarning sogʻligʻini asrash Siz rahbarlarning, asosiy vazifangizdir.

Teglar:
sinfxonalar, sovuq, maktabdagi ahvol

Asosiy mavzular