O‘zbekiston MXX chegara qo‘shinlari harbiylariga yangi uylar kaliti topshirildi

TOShKENT, 1 yanv — Sputnik. Chegarachilarga yangi uylar topshirildi, deb xabar qilmoqda Samarqand viloyati hokimligi matbuot-xizmati.

Xabarda ta’kidlanishicha, Urgut tumanidagi O‘zbekiston Respublikasi MXX chegara qo‘shinlariga qarashli harbiy qism harbiy xizmatchilariga Yangi yil bayrami arafasida yangi uylarning kaliti topshirilgan.

Shu munosabat bilan tashkil etilgan tadbirda tuman hokimligi, mas’ul idoralar, jamoatchilik vakillari, faxriylar, harbiy xizmatchilar va ularning oila a’zolari, ota-onalari ishtirok etdi, deyilgan xabarda.

"Milliy armiyamizni modernizatsiyalash, moddiy-texnik bazasini mustahkamlash barobarida, harbiy xizmatchilar va ularning oilalari uchun zamonaviy sharoitlar yaratib berilmoqda, — deydi yangi uyga ega bo‘lgan harbiy xizmatchi B. Xolmirazayev. — Bunga javoban yanada fidoyilik bilan xizmat qilib, Vatanimiz tinchligi, osmonimiz musaffoligini saqlash yo‘lida bor kuch-g‘ayratimizni ishga solamiz".

Ta’kidlanishicha, To‘rtko‘l mahalla fuqarolar yig‘ini hududida barpo etilib, foydalanishga topshirilgan 6 ta uch xonali xonadonlarda har tomonlama qulay sharoit yaratilgan.