TOShKENT, 11 yanv — Sputnik. O‘zbekistondagi hukumat tashkilotlarining yigirmadan ortiq vakili Toshkentda tashkillashtirilgan kiberxavfsizlikni ta’minlash masalalari bo‘yicha ikki kunlik seminarda ishtirok etishdi, deb xabar qildi AQShning O‘zbekistondagi elchixonasi matbuot xizmati.
AQSh va Germaniyaning O‘zbekistondagi elchixonalari hamkorligida tashkil etilgan seminar kiberxavfsizlik strategiyasi va sohadagi ilg‘or tajribalarga bag‘ishlandi.
Unda Ozarbayjon, Germaniya, Portugaliya, Polsha, Ukraina va Amerika Qo‘shma Shtatlaridan kelgan mutaxassislar ishtirok etdi. Ular o‘zbekistonlik mazkur sohaga mas’ul vakillar bilan kibersohadagi milliy xavfsizlikni ta’minlash uchun zarur bo‘lgan strategiya, amaliyot, xalqaro ilg‘or tajribalar va umumjamiyatga taalluqli yondashuvlar bo‘yicha o‘z tajribalari bilan o‘rtoqlashishdi.
O‘zbekistonda Marshall nomidagi Yevropa markazi tomonidan mana shunday ilk seminar 2015-yilda o‘tkazilgandi.
