Toshkent IIB firibgarlardan ehtiyot bo‘lishga chaqirdi

TOShKENT, 10 apr — Sputnik. Angrenlik J. Mutavalliyev tuman elektr tarmoqlari idorasida allaqachon ishdan bo‘shagan bo‘lsada, fuqarolarni aldab, ulardan pul undirib kelgan, deb xabar qilmoqda O‘zbekiston IIV matbuot-xizmati.

"Angren shahrida istiqomat qiluvchi Jamshid Mutavalliyev hozirda tuman elektr tarmoqlari idorasidan bo‘shagan bo‘lsada, mahallalarda ishlatilgan elektr xaqini to‘lash kerak, deb fuqarolarni aldab soxta to‘lov qog‘ozlari va muxr yordamida pul undirib yuradi. Tuman elektr ta’minoti tarmoqlari inspektori bo‘lib ishlaganligi bois,  o‘ljalar soni kutganidan ham ziyoda bo‘ldi", — deyiladi xabarda.

Xabarda aytilishicha, aslida Jamshid Mutavalliyev bir necha bor firibgarlik jinoyati uchun jinoiy javobgarlikka tortilgan.

2016 yil 10-mart kuni  Jamshid Mutavalliyev Firuza Parpiyevaning ishonchiga kirib, u istiqomat kilayotgan xonadonning kommunal to‘lovlarini to‘lab qo‘yishga va’da qiladi va hisobida 550 ming so‘m pul bo‘lgan plastik kartochkasini firibgarlik yo‘li bilan qo‘lga kiritib, o‘z extiyojlari uchun ishlatib yuboradi.     

O‘zbekiston IIV "har bir fuqaro o‘z haq-huquqlarini yaxshi anglab, qonunlarni puxta o‘rgansalar, olgan huquqiy bilimlari bunday firibgarlarning nayrangiga qarshi eng samarali vosita bo‘ladi", — deya ogohlantirgan.

Ta’kidlash joizki, elektr tarmoqlari, gaz idoralari xodimlari orasida firibgarlik jinoyatlari keyingi vaqtlarda juda ko‘p qayd etilgan. Mart oyi oxirlarida Samarqand shahar IIB boshlig‘i o‘rinbosari Z.Xo‘jayev joriy yilning dastlabki ikki oyida shaharda 45 ta firibgarlik jinoyati sodir etilganligini ta’kidlab, ular orasida "Samarqandshahargaz" filiali xodimi ham borligini qayd etgan edi.

"O‘ztransgaz" AK mas’ul xodimi Baxtiyor Po‘latov ham gaz idorasi xodimi va iste’molchilar o‘rtasidagi munosabatning hozirgi ahvolini qoniqarsiz, deb baholab, bundan keyin gaz idorasiga ishga kiruvchining nomzodi har tomonlama o‘rganilishini ma’lum qilgan.