Samarqand aholisi namunali uylar sifatidan shikoyat qilmoqda

© Sputnik / Igor Ageyenko / Mediabankka o‘tishYangi tipdagi arzon uylar qurilishi
Yangi tipdagi arzon uylar qurilishi - Sputnik O‘zbekiston
Obuna bo‘lish
"Bizning uylar qurilishida ochiq-oydin mas’uliyatsizlikka yo‘l qo‘yilmoqda. Qurilishdagi mas’uliyatsizlik va sustkashlikdan norozilar soni ortib bormoqda. Buni eshitadigan, ishda o‘zgarish qiladigan odam bormi?", - deb yozgan fuqaro o‘z maktubida

TOShKENT, 21 avg — Sputnik. Past Darg‘om tumanida yashovchi fuqaro yangi tipdagi uylar qurilishi ishlari mas’uliyatsizlik bilan amalga oshirilayotganidan shikoyat qildi, deb xabar qilgan "Zarafshon" nashri.

"…Past Darg‘om tumanida ham arzon uy-joylar qurilishi aniq bo‘lgach, tegishli hujjatlarni to‘plab "Qishloq qurilishinvest" injiniring kompaniyasi viloyat filialiga topshirdik. Shartnoma tuzildi. Joriy yilning yanvar oyida boshlang‘ich to‘lovni amalga oshirdik.

Mirziyoyev ko‘pqavatli uylarni tartibga keltirishni buyurdi
Xullas, uy-joylar tumandagi "Kamolot" massivida "216-son ta’mirlash qurilish" korxonasi tomonidan quriladigan bo‘ldi. E’tiborlisi, yuqoridagi shartnomada uy-joylarning topshirilish muddati ko‘rsatilmagan, ochiq qoldirilgan edi. Shunchaki og‘zaki tarzda mustaqillik bayrami arafasida yangi uylar foydalanishga topshirilishi aytildi. Uyimiz bilan bir vaqtda hududda boshqa qurilish korxonasi tomonidan namunali uylar qurilishi boshlangan edi. Yaqin kunlarda bu uylar topshirilishi rejalashtirilgan. Ammo bizning uylarda qurilish ishlari hali hamon o‘lda-jo‘lda qolib ketmoqda.

Gap muddatda ham emas. Biz bu uylarning sifatidan xavotirdamiz. O‘zimiz yashaydigan uyning qurilish jarayonlarini kuzatar ekanmiz, devordagi g‘ishtlarning butunidan ko‘ra, singan, darz ketganlari ko‘p ekani hayron qoldirdi bizni. Eng yomoni, ayrim devorlar qiyshiq ekani hozirdan ko‘zga tashlanib qolgan. Fisht terish tartib-qoidalariga umuman rioya qilinmagan. Devorlar burchaklari orasida bir necha santimetrli ochiq joylar qolgan. Bu joylar sement qorishmasi bilan to‘ldirilishi kerak emasmi? Tag‘in deng, sement qorishmasining o‘zi, qo‘lga olsangiz uvalanib ketadi. Erta bir kun kuchsizgina yer qimirlashi ham bu devorlarni yiqitib yuborishidan qo‘rqayapmiz.

Qo‘rqayapmiz deganimizning sababi xona ichidagi pardevor (peregorodka)ni bir qo‘lingiz bilan qimirlatishingiz mumkin. Xudo ko‘rsatmasin, vazni og‘irroq odam bu devorga suyansa ustiga qulashi hech gap emas. Xo‘sh, biz bu uyda ertaga qanday xotirjam yashaymiz?

Kottej tipida qurilayotgan uylar - Sputnik O‘zbekiston
Arzon uylar nechchi balli zilzilaga bardosh beradi?
Qoidaga ko‘ra, terilayotgan g‘ishtlar orasiga metall simlar qo‘yilishi kerak. Ammo bunday simlarni har joyda bir dona uchratasiz, xolos. Quruvchilar "biz materialning borini ishlatamiz-da" desa, qurilish korxonasining ish yurituvchisi "quruvchilarning esidan chiqqandir" deydi. Nima bo‘lganda ham qurilayotgan uy-joylar sifati bizni xavotirga solmoqda. Quruvchilarning aytishicha, endi bu devorlarning xavfsizligini ta’minlashning birgina yo‘li bor — devorlarga suvoq oldidan temir setka o‘rnatish kerak. Ammo bor-yo‘g‘i, simni eplab yetkazmagan, o‘rnatmagan qurilish korxonasi qimmat narxdagi temir setka o‘rnatarmikan? Yoki bizning uy devori yiqilgunga qadar qimirlab turaveradimi?

Xullas, bizning uylar qurilishida ochiq-oydin mas’uliyatsizlikka yo‘l qo‘yilmoqda. Qurilishdagi mas’uliyatsizlik va sustkashlikdan norozilar soni ortib bormoqda. Buni eshitadigan, ishda o‘zgarish qiladigan odam bormi?", — deb yozgan fuqaro o‘z maktubida.

Yangiliklar lentasi
0